Արտաշատ մայրաքաղաքը կդառնա պատմամշակութային արգելոց

ԵՐԵՎԱՆ, 30 մարտի – Sputnik. Պատմական Արտաշատ մայրաքաղաքի տարածքում կստեղծվի «Արտաշատ մայրաքաղաք» պատմամշակութային արգելոցը։ Այս որոշումն ընդունվել է ՀՀ կառավարության այսօրվա նիստում։

Կառավարության համոզմամբ` արգելոցի ստեղծումը կնպաստի զբոսաշրջության զարգացմանը և զբոսաշրջիկների թվի աճին:

Արգելոցի ֆինանսավորումն իրականացվելու է տոմսային տնտեսության գործարկումից հետո այցելուներից ստացված միջոցներով։

Կառավարությունը համոզված է, որ արգելոցի ստեղծումը կապահովի հուշարձանախմբի ամբողջ տարածքի պատշաճ պահպանությունը, մասնագիտական ամբողջական ուսումնասիրման ու հանրահռչակման հնարավորությունը, զբոսաշրջային երթուղիներում արգելոցի տարածքի ներգրավումը, ինչպես նաև պետական ֆինանսավորման առավել արդյունավետ օգտագործումը:

Կառավարության 2009-22թթ–ին ընդունած որոշումներով ՀՀ–ում արդեն իսկ ստեղծվել են «Զորաց քարեր բնակատեղի», «Լոռի բերդ քաղաքատեղի», «Ամբերդ ամրոց» և «Բերդ», «Բջնի-ամրոց», «Սմբատաբերդ» «Դաշտադեմ ամրոց» և «Մայրաքաղաք Դվին» պատմամշակութային արգելոցները։