ԵՐԵՎԱՆ, 28 մարտի – Sputnik. Փարիզում մեկնարկել է կառավարության կողմից ընդունված կենսաթոշակային բարեփոխումների դեմ ուղղված տասներորդ համազգային բողոքի ցույցը, որին մի քանի տասնյակ հազար մարդ է մասնակցում։ Տեղեկությունը հայտնում է ՌԻԱ Նովոստին։
Հունվարից ի վեր արդեն 10-րդ անգամ է` Ֆրանսիայի առաջատար արհմիությունները համազգային գործադուլի օր են հայտարարում` բողոքելով կենսաթոշակային տարիքի բարձրացումից։
«Մենք կշարունակենք այնքան ժամանակ, քանի դեռ կենսաթոշակային բարեփոխումը չի չեղարկվել։ Մակրոնը պոռթկման եզրին է, դա երևում է Անգլիայի թագավորի այցի չեղարկումից։ Դարմանենը (ներքին գործերի նախարար. խմբ.) սրում է բռնության մակարդակը` հրամայելով բոլորին թունավորել գազով և բազմության ուղղությամբ նռնակներ նետելով», – հայտարարել է «Անհնազանդ Ֆրանսիա» կուսակցության երիտասարդ առաջնորդ Օրելյեն Լը Կոկը։
Ցուցարարները երթը սկսել են Հանրապետության հրապարակից, նախատեսում են ակցիան ավարտել Ազգերի հրապարակում։
Նրանք վանկարկում են. «Ձեռք մի՛ տվեք մեր թոշակներին», «Մակրոն, հեռացի՛ր»։
Հիշեցնենք` հունվարի 10-ին Ֆրանսիայի վարչապետ Էլիզաբեթ Բորնը ներկայացրել էր կառավարության մշակած կենսաթոշակային բարեփոխումների նախագիծը, որով նախատեսվում է բարձրացնել կենսաթոշակային տարիքը՝ 62–ից հասցնելով 64 տարեկանի։ Սակայն այդ բարձրացումը պետք է լինի աստիճանաբար, և գործընթացը կավարտվի 2030 թվականին։ Նոր ռեժիմը կկիրառվի 1961 թվականի սեպտեմբերից հետո ծնվածների համար։
Ֆրանսիայի նախագահ Էմանուել Մակրոնը 2022 թվականի նախընտրական քարոզարշավի ժամանակ հայտարարել էր, որ պատրաստվում է կենսաթոշակային բարեփոխումներ իրականացնել մինչև իր երկրորդ մանդատի ավարտը։
Բարեփոխումը բողոքի ալիք է բարձրացրել հասարակության շրջանում։