ԵՐԵՎԱՆ, 26 մարտի - Sputnik. Շիրակի մարզի Անի խոշորացված համայնքում ՏԻՄ ընտրությունները բավական ակտիվ են ընթանում։ Բավական շատ են նաև ԶԼՄ ներկայացուցիչները։
20 տեղամաս համակարգող թիվ 33 ընտրատարածքային ընտրական հանձնաժողովի նախագահի տեղակալ Արթուր Նաջարյանը Sputnik Արմենիայի հետ զրույցի ժամանակ չհերքեց՝ այս անգամ համայնքում ոստիկանների ներկայությունը ևս մեծ էր:
«Անվտանգության նկատառումներով է՝ զուտ կանխարգելիչ միջոցառում: Փա՛ռք Աստծո, մինչ այս պահը միջադեպ չի եղել»,-նշեց Արթուր Նաջարյանը տեղեկացնելով, որ իրենք դեռ արձանագրված բողոքներ չունեն, եղել են մի քանի տեխնիկական խնդիրներ:
Պատասխանատուն նաև տեղեկացրեց, որ ժամը 17:00 դրությամբ ընտրության մասնակցել է ընտրողների ավելի քան 53 տոկոսը: Ամենաակտիվը Լանջիկ բնակավայրն է:
Անի համայնքում առաջադրված են «Ազգ-համայնք» դաշինքը (կազմում` «Հայաստանի ժողովրդավարական ազատական միություն» կուսակցությունը և Արտակ Գևորգյանի ղեկավարած Ռեֆորմիստների կուսակցությունը), «Իմ հզոր համայնք» (Արմենակ Նաջարյան), «Հայկական երազանք» (Ագուն Սաղաթելյան) և «Քաղաքացիական պայմանագիր» կուսակցությունները (Արման Սարիբեկյան):
Նախորդ տարի սեպտեմբերի 25-ին կայացած ընտրություններում Անիում ամենաշատ ձայնը հավաքել էր համայնքը 18 տարի ղեկավարած Արտակ Գևորգյանը՝ ձայների 49 տոկոսը հավաքելով: «Հայկական երազանքի» և «Քաղաքացիական պայմանագրի» անդամները բոյկոտեցին ավագանու նիստերը, և համայնքապետ չընտրվեց: Օրենքի ուժով վարչապետը համայնքի ժամանակավոր ղեկավար նշանակեց տեղական ընտրություններում պարտված իր կուսակից Արման Սարիբեկյանին։
Անի համայնքում ընտրողները բավական ակտիվ են
© Sputnik / Armenuhi Mkhoyan
Շիրակի մարզի 19 բնակավայր միավորող, 21 հազար բնակչություն ունեցող Անի խոշորացված համայնքում ընտրողների ընդհանուր թիվը 15 918 է։
Հիշեցնեք՝ Սյունիքի մարզի Սիսիան և Շիրակի մարզի Անի համայնքներում ընթանում են ավագանու արտահերթ ընտրություններ: Անի խոշորացված համայնքում գործում է 20 ընտրատեղամաս, Սյունիքի մարզի Սիսիան համայնքում՝ 41: Սիսիան համայնքում ընտրողների թիվը մարտի 19 - ի դրությամբ 22880 է: