ԵՐԵՎԱՆ, 24 մարտի – Sputnik. Ռուս դիվանագետները դեսպան Սերգեյ Կոպիրկինի գլխավորությամբ և Հայաստանում ՌԴ առևտրային ներկայացուցիչ Աննա Դոնչենկոն այցելել են Իջևան, որտեղ քննարկել են երկկողմ համագործակցության հեռանկարները, հայտնել են «Ռոսսոտրուդնիչեստվոյի» ներկայացուցչության մամուլի ծառայությունից:
«Տավուշի մարզպետ Հայկ Ղալումյանի հետ հանդիպման ժամանակ քննարկվել է Ռուսաստանի և Հայաստանի միջև միջտարածաշրջանային համագործակցության և բարեկամական հարաբերությունների ամրապնդման հարցը: Քննարկվել են նաև փոխշահավետ համագործակցության հեռանկարները», - նշված է հաղորդագրության մեջ:
Այցի ընթացքում ՌԴ առևտրային ներկայացուցիչ Աննա Դոնչենկոն խոսել է գործընկերային հարաբերությունների հաստատման մասին, ինչին մեծապես նպաստում են ցուցահանդես-տոնավաճառները, գործունեության կոնկրետ ոլորտին նվիրված թեմատիկ միջոցառումները, ընկերությունների ներկայացուցիչների մասնավոր այցերը:
Իջևանում կայացած հանդիպումների ընթացքում քննարկվել են նաև շրջանների և ռուսական ընկերությունների միջև համագործակցության հնարավոր ուղղությունները:
Ռուսաստանի դեսպանը շնորհակալություն է հայտնել հյուրընկալության համար, ավելացնելով, որ մարզեր այցելությունն իր աշխատանքի կարևոր մասն է: Նա նշել է, որ անհրաժեշտ է պահպանել և զարգացնել բարեկամական հարաբերությունները։
Հայաստանում «Ռոսսոտրուդնիչեստվոյի» ներկայացուցչության ղեկավարի տեղակալ, Գյումրիում ռուսական տան ղեկավարի պաշտոնակատար Անտոն Բերյանևն իր հերթին ներկայացրել է ներկայացուցչության մասնաճյուղի գործունեությունը սահմանամերձ շրջանում: Մասնավորապես, նա խոսել է Հայաստանի հավաքականի նախկին դարպասապահ Ռոման Բերեզովսկու մրցանակի համար դպրոցական ոչ պրոֆեսիոնալ թիմերի միջև ֆուտբոլային մրցաշարի մասին:
Դեսպանն այցելել է նաև ԵՊՀ Իջևանի մասնաճյուղ, որտեղ հանդիպում է ունեցել ուսանողների և Իջևանի Ռուսական տան կոնտակտային կենտրոնի ղեկավար Մարատ Զուրաբյանի հետ, որը պատմելէ կենտրոնի գործունեության մասին:
Այնուհետև Կոպիրկինը մասնակցել է Իջևանի ռուսական կենտրոնում ռոբոտաշինության բաց դասին: Դեսպանը գրքեր է նվիրել ուսանողներին և աշակերտներին և մաղթել հաջողություններ ուսման մեջ։