ԵՐԵՎԱՆ, 24 մարտի – Sputnik. Երևանի փոխքաղաքապետ Գևորգ Սիմոնյանին կալանավորելու որոշման դեմ բողոք է ներկայացվել վերաքննիչ քրեական դատարան։ Տեղեկությունը Sputnik Արմենիայի հետ զրույցում ասաց Սիմոնյանի փաստաբան Էմին Խաչատրյանը:
«Մենք բողոք ենք ներկայացրել վերաքննիչ քրեական դատարան, սակայն դեռ մակագրում չկա»,–ասաց Խաչատրյանը։
Նրա խոսքով` երկու անգամ միջնորդություն են ներկայացրել, որպեսզի առերես հարցաքննություններ անցկացվեն Սիմոնյանի դեմ ցուցմունք տված մարդկանց հետ, սակայն անօգուտ։
«Օրենքը հստակ ամրագրում է, որ երբ մեղադրյալի և այլ անձանց ցուցմունքներում լինում են հստակ հակասություններ, տեղի են ունենում առերես հարցաքննություններ»,–ասաց փաստաբանը։
Նա ընդգծեց, որ եթե առերես հարցաքննություններ չլինեն, դա իրենց թույլ կտա ողջամտորեն ենթադրել, որ նման մարդիկ ուղղակի չկան։
Հակակոռուպցիոն կոմիտեն քրեական գործ է հարուցել՝ կապված 2020-2021 թվականներին Covid-19 համաճարակի դեմ պայքարի ընթացքում կատարված չարաշահումների հետ։ Գործի շրջանակում կալանավորվել են առողջապահության նախկին փոխնախարար, այժմ Երևանի փոխքաղաքապետ Գևորգ Սիմոնյանը, ինչպես նաև «Մեդլայն Կլինիկ» ԲԿ–ի տնօրեն Բաբկեն Շահումյանը։ Գործով ներգրավված են առողջապահության ոլորտի ևս 9 ներկայացուցիչներ։ Մամուլում տեղեկություններ են շրջանառվում, որ քրեական գործ կարող է հարուցվել նաև ՀՀ Ազգային ժողովի պատգամավոր, առողջապահության նախկին նախարար Արսեն Թորոսյանի դեմ։