ԵՐԵՎԱՆ, 23 մարտի – Sputnik. Ծանրամարտի եվրոպական ֆեդերացիան (EWF) հայտարարել է, որ ռուս և բելառուս ծանրամարտիկներին չեն ներառել Երևանում ապրիլի 15-ից 23-ը կայանալիք Եվրոպայի առաջնության մասնակիցների վերջնական ցուցակում, հայտնում է «Սպորտ–էքսպրեսը»։
«Ռուսաստանի և Բելառուսի մարզիկները վերջնական ցուցակում չկան», – ասել է EWF–ի ներկայացուցիչը։
Ծանրամարտի Եվրոպայի 2023 թվականի առաջնության մասնակիցների նախնական ցանկում 38 ռուս և 27 բելոռուս մարզիկ էր (տղամարդ և կին) ներառված, այդ թվում պահեստային։
Երևանում ապրիլին կայանալիք Եվրոպայի առաջնությունը Փարիզում 2024 թվականին անցկացվող օլիմպիական խաղերի ընտրական մրցաշարերից մեկն է։ Եթե ծանրամարտի միջազգային ֆեդերացիան (IWF) թույլ տա ռուսաստանցիներին մասնակցել ասիական մրցաշարերին, ապա նրանք տեսականորեն հնարավորություն կունենան մասնակցելու Ասիայի առաջնությանը, որն անցկացվելու է Հարավային Կորեայում մայիսի 3-ից 13-ը և նույնպես 2024 թվականի օլիմպիական խաղերի որակավորման խաղերից է։
2022 թվականի մարտին IWF–ն անորոշ ժամանակով որոշել էր զրկել ռուսաստանցի և բելառուս մարզիկներին իրենց դրոշի ներքո մրցաշարերին հանդես գալու հնարավորությունից։