ԵՐԵՎԱՆ, 22 մարտի – Sputnik. Տարածաշրջանի երկրներն են խաղաղության երաշխավորը, և օտարերկրյա ուժերի ներկայությունը չի կարող խաղաղություն ապահովել. նրանք այլ նպատակներ են հետապնդում։ News.am-ի ու Հ1-ի լրագրողների հետ զրույցում նման կարծիք է հայտնել Երևանում գտնվող Իրանի փոխարտգործնախարար Ալի Բաղերին։
Նրանից հետաքրքրվել են նաև, թե ինչպե՞ս կգնահատի Ադրբեջանի այն գործելաոճը, որ շարունակում է օկուպացված պահել Հայաստանի տարածքները, 100 օր շրջափակված է պահում Լաչինի միջանցքը՝ չնայած ՄԱԿ–ի Արդարադատության դատարանի որոշմանը։
«Աստված դիվանագետներին ստեղծել է, որպեսզի խաղաղ երկխոսությունների միջոցով կարողանան կայունության հաստատմանը հասնել: Իրանն իր ողջ հնարավորությունն ու ներուժը կօգտագործի խաղաղ երկխոսությունների միջոցով խնդիրներին լուծում տալու համար։ Ենթադրում եմ, որ տարածաշրջանի երկրների ղեկավարներն այնքան խելամիտ են, որ երկխոսության տարբերակը կընտրեն հարցերի լուծման համար»,-ասաց նա:
Միաժամանակ, Բաղերին նշեց, որ Իրանի համար հարևանների հետ հարաբերությունների զարգացումն առաջնահերթություն է, և Իրանի արտաքին քաղաքականության մեջ Հայաստանի Հանրապետությունն իր ուրույն տեղն է զբաղեցնում։ Նա հայտնել է, որ շատ արդյունավետ քննարկումներ է ունեցել ՀՀ ԱԳ նախարար Արարատ Միրզոյանի, ինչպես նաև փոխնախարարներից մեկի հետ։
Հանդիպումների ընթացքում, ըստ Իրանի ԱԳ փոխնախարարի, ընդգծվել է պաշտոնական Թեհրանի կայուն դիրքորոշումը տարածաշրջանում խաղաղության հաստատման հարցում. «Իրանը վստահելի գործընկեր է տարածաշրջանում խաղաղության և անվտանգության հաստատման հարցում»։
Հիշեցնենք, որ Բաղերին երեկ թվիթերյան իր էջում հայտնել էր, որ երկօրյա այցով ՀՀ է գալիս հայ գործընկերների հրավերով։
Հավելենք, որ 2022-ի նոյեմբերի վերջին Թեհրանում ՀՀ ԱԳ նախարարի տեղակալ Մնացական Սաֆարյանի և ԻԻՀ ԱԳ նախարարի տեղակալ Ալի Բաղերիի գլխավորությամբ կայացել էր Հայաստանի և Իրանի ԱԳ նախարարությունների հերթական քաղաքական խորհրդակցությունները։