ԵՐԵՎԱՆ, 22 մարտի – Sputnik. Ամենայն Հայոց կաթողիկոս Գարեգին Երկրորդն այսօր ընդունել է Ժողովուրդների հոգևոր միասնության միջազգային հիմնադրամի նախագահ, փ․գ․դ․ Վալերի Ալեքսեևին։ Տեղեկությունը հայտնում է Մայր աթոռի տեղեկատվական համակարգը։
Ալեքսեևը տեղեկություններ է հայտնել ԱՊՀ երկրներում 2023 թվականը ռուսաց լեզվի տարի հռչակման առիթով հիմնադրամի կողմից ծրագրվող միջոցառումների, ներառյալ` «Ռուս գրողները և ուղղափառությունը» տասներկու հատորանոց մատենաշարի շնորհանդեսի վերաբերյալ։
«Ամենայն Հայոց կաթողիկոսը, իր օրհնությունն ու բարեմաղթանքները բերելով Ժողովուրդների հոգևոր միասնության միջազգային հիմնադրամի նախագահին, գնահատանքով անդրադարձավ հիմնադրամի գործունեությանը, որն ուղղված է քրիստոնյա ժողովուրդների միջև հոգևոր-մշակութային կապերի ընդլայնմանն ու զորացմանը, հոգևոր-բարոյական արժեքների պաշտպանությանն ու ամրապնդմանը, Եկեղեցիների հոգևոր, կրթական ու սոցիալական առաքելությանը սատարելուն»,– նշված է հաղորդագրության մեջ։
Վեհափառը ողջունել է ներկայացված ծրագրերը, որոնք պիտի նպաստեն փոխճանաչմանը և ժողովուրդների միջև մշակութային կապերի սերտացմանը։
Անդրադարձ է կատարվել երկրների և ժողովուրդների առջև ծառացած մարտահրավերներին։ Զրուցակիցները քննարկել են տարածաշրջանում առկա անվտանգային սպառնալիքները, խաղաղության և կայունության հաստատման ուղղությամբ ներդրվող ջանքերը։