ԵՐԵՎԱՆ, 22 մարտի - Sputnik. Հայ պայմանագրային զինծառայողի անհետացման հետ կապված միջադեպը որոշակի հարցեր է առաջացնում, մասնավորապես, կապված Հայաստանում Եվրամիության դիտորդական առաքելության գործառույթների և խնդիրների հետ: Այս մասին Sputnik Արմենիային ասաց ԱԺ «Պատիվ ունեմ» խմբակցության քարտուղար, պաշտպանության և անվտանգության հարցերով հանձնաժողովի անդամ Տիգրան Աբրահամյանը։
Պատգամավորը որոշակի հակադրություն է տեսնում դեպքի վայր մեկնած ռուս զինվորականների գործողությունների և մինչ այժմ լռություն պահպանող եվրոպացի դիտորդների վարքագծի միջև։
«Մենք գիտենք, որ զինվորի անհետացումից մի քանի ժամ անց դեպքի վայր են մեկնել ռուս զինվորականները։ Նրանց մեքենան ընկել է ադրբեջանցիների կրակի տակ, թեև վերջիններս, որքան ինձ հայտնի է, նախապես արդեն գիտեին ռուսների մոտենալու մասին։ Եվ դա նրանց չի խանգարել կրակ բացել», - նշել է պատգամավորը։
Աբրահամյանը նկատում է, որ եթե Սյունիքում ռուս զինվորականների գտնվելը և նրանց գործառութային պարտականությունները հիմնվում են 2020 թվականի 44-օրյա պատերազմից հետո Ռուսաստանին ուղղված Հայաստանի համապատասխան դիմումի վրա, ապա մինչև վերջ պարզ չէ, թե ինչպես պետք է նման իրավիճակներում գործեն Հայաստանում տեղակայված եվրոպացի դիտորդները:
«Ես շատ կուզենայի իմանալ՝ արդյոք նման միջադեպերը հիմք են եվրոպական կառույցների արագ արձագանքման համար, թե ԵՄ–ն կսահմանափակվի համապատասխան զեկույցով.այս բոլոր հարցերը պարզաբանման կարիք ունեն», - ասաց նա:
Ինչ վերաբերում է բուն միջադեպի հանգամանքներին, ապա պաշտպանական հանձնաժողովի ներկայացուցիչը նշում է, որ այն վայրը, որտեղ պայմանագրային զինծառայողը մոլորվել է, բավականին վտանգավոր է։
«Այդ հատվածը` դեպի Սև լիճ գնացող ճանապարհը, դաշտային ճանապարհ է և այնտեղ եղանակային վատ պայմանների դեպքում հնարավորություն կա մոլորվելու։ Մնացած բոլոր դեպքերում այնտեղ հաճախակի մեկնող, այնտեղ ծառայություն իրականացնող անձնակազմի համար մոլորվելու խնդիր չէր լինի»,–նշեց Աբրահամյանը։
Իրավիճակը բարդացնում է նաև այն հանգամանքը, որ այդ հատվածում ադրբեջանական զինուժը միանգամից մի քանի ուղղություններով մխրճվել է հայկական պաշտպանության խորքը, որը թույլ է տալիս հակառակորդին հետևել շփման գծում հայկական զինված ուժերի տեղաշարժերին։ Այստեղ հայկական ստորաբաժանումները բավականին խոցելի են։
Հիշեցնենք՝ Սյունիքի մարզի Խնձորեսկ գյուղի բնակիչ, 40-ամյա պայմանագրային զինծառայող Մարտին Գյուլամբարյանը մարտի 21-ին մոլորվել էր և հայտնվել ադրբեջանական ԶՈւ-ի վերահսկողության տակ գտնվող Սև լճի շրջանում: Հաջորդ օրը առավոտյան նրան հաջողվել է վերադարձնել։
Տելեգրամյան ալիքները գրել էին, որ ադրբեջանական ստորաբաժանումները գնդակոծել են որոնողափրկարարական գործողությանը մասնակցած ռուս զինվորականների մեքենան։