ԵՐԵՎԱՆ, 22 մարտի – Sputnik. Վերջին շրջանում Ադրբեջանի իշխանությունները փորձ են անում հավելյալ` կրոնական երանգ հաղորդել հակամարտությանը, հայկական կողմը հնարավորություն ունեցավ արաբ գործընկերներին ներկայացնել որ այն, ինչ կատարվում է Լեռնային Ղարաբաղի ու նաև Հայաստանի ինքնիշխան տարածքի շուրջ, կրոնական որևէ երանգ չունի։ ԱԺ–ում կառավարության հետ հարց ու պատասխանի ժամանակ հայտարարեց ՀՀ ԱԳ նախարար Արարատ Միրզոյանը` անդրադառնալով իր մասնակցությանը մարտի 7-9–ը Եգիպտոսում Արաբական պետությունների լիգայի (ԱՊԼ) խորհրդի նիստերին:
«Ունեմ օբյեկտիվ տպավորություն, որ նաև մեր արաբ գործընկերները համոզվեցին, որ այս հակամարտությունը, որ ունեցել ենք և ունենք Լեռնային Ղարաբաղի շուրջ, նաև ՀՀ–ի ինքնիշխան տարածքի շուրջ և այլ հարցեր, որևէ կրոնական երանգ չունեն։ Ավելին, այդ նույն օրերին այնտեղ բացվեց Մատենադարանում պահվող իսլամական հին մատյանների ցուցահանդես, և նրանք իրենց աչքերով կարողացան տեսնել, որ Հայաստանը մեծ հարգանք ունի բոլոր կրոնների ու մշակույթների նկատմամբ»,– նշեց Միրզոյանը։
ՀՀ արտաքին քաղաքական գերատեսչության ղեկավարի խոսքով` Եգիպտոս կատարած իր այցը հնարավորություն էր մեկ սրահում արաբական երկրների ԱԳ նախարարների ներկայությամբ ներկայացնել հայկական կողմի տեսլականը տարածաշրջանում ընթացող զարգացումների վերաբերյալ։