ԵՐԵՎԱՆ, 21 մարտի – Sputnik. Իրանը հույս ունի, որ «Հյուսիս-Հարավ» տրանսպորտային միջանցքն ավարտին կհասցվի ու կսկսի գործարկվել մինչև 2025 թվականը: Այս մասին ՌԻԱ Նովոստիին ասել է Իրանի էկոնոմիկայի եւ ֆինանսների նախարար Էհսան Խանդուզին։
«Մենք հույս ունենք տեսնել «Հյուսիս-Հարավ» միջանցքի նախագծի ավարտը և երկաթուղային գծերի բացումը մինչև Իրանի ներկայիս կառավարության ժամկետների ավարտը (Իրանում հաջորդ նախագահական ընտրությունները տեղի կունենան 2025 թվականի ամռանը), - ասել է Խանդուզին։
«Հյուսիս-Հարավ» միջազգային պայմանագիրը ստորագրվել է 2000 թվականի սեպտեմբերի 12-ին Սանկտ Պետերբուրգում։ Նախագիծը 7,2 հազար կմ երկարությամբ տրանսպորտային միջանցք է, որը պետք է Իրանի ու Ռուսաստանի տարածքով կապ ապահովի Բալթյան տարածաշրջանի և Հնդկաստանի միջև։ Միջանցքի թողունակությունը տարեկան 20-ից 30 մլն տոննա է։ Հայաստանը «Հյուսիս-Հարավ» համաձայնագրի լիիրավ անդամ է դարձել դեռ 2004թ.