ԵՐԵՎԱՆ, 19 մարտի – Sputnik. Սաուդյան Արաբիայի թագավոր Սալման Բին Աբդուլ Ազիզ ալ Սաուդը Էր Ռիադ է հրավիրել Իրանի նախագահ Էբրահիմ Ռայիսիին։ Տեղեկությունը Twitter-ում հայտնել է Իրանի նախագահի աշխատակազմի ղեկավարի քաղաքական հարցերով տեղակալ Մոհամադ Ջամշիդին։
«Ռայիսիին ուղղված նամակում Սաուդյան Արաբիայի թագավորը ողջունել է երկու եղբայրական երկրների միջև գործարքը, հրավիրել է նրան Էր Ռիադ և սերտ տնտեսական ու տարածաշրջանային համագործակցության կոչ արել։ Ռայիսին ողջունել է հրավերը և ընդգծել համագործակցությունն ընդլայնելու Իրանի պատրաստակամությունը», - գրել է Ջամշիդին։
Թեհրանի և Էր Ռիյադի միջև դիվանագիտական հարաբերությունները խզվել են 2016 թվականին Իրանում Սաուդյան դիվանագիտական ներկայացուցչությունների վրա հարձակումից հետո։ Ակցիայի մասնակիցները բողոքում էին հայտնի շիա աստվածաբան Նիմր ան Նիմրի մահապատժի դեմ։
Վերջին ամիսներին երկու կողմերն էլ ցանկություն էին հայտնել վերացնել տարաձայնությունները։
2023 թվականի մարտի 10-ին Իրանն ու Սաուդյան Արաբիան Չինաստանի միջնորդությամբ համաձայնագիր են ստորագրել դիվանագիտական հարաբերությունների վերականգնման մասին, երկու ամսվա ընթացքում նախատեսվում է բացել դեսպանություններ։