ԵՐԵՎԱՆ, 17 մարտի – Sputnik. Ռուսաստանը մնում է Հայաստանի զբոսաշրջության ոլորտի հիմնական թիրախային շուկան։ Ռուսաստանում զբոսաշրջության և հյուրընկալության արդյունաբերության միջազգային ցուցահանդեսում Հայաստանի տաղավարի բացակայությունը դեռ չի նշանակում, որ զբոսաշրջության կոմիտեն աշխատանք չի տանում Հայաստանը հանրահռչակելու ուղղությամբ։ Այս մասին Sputnik Արմենիային հայտնեցին Հայաստանի էկոնոմիկայի նախարարության զբոսաշրջության կոմիտեից։
Ավելի վաղ հայտնի էր դարձել, որ մարտի 16-ից 18-ը Մոսկվայում կազմակերպված զբոսաշրջության և հյուրընկալության ոլորտի խոշորագույն միջազգային ցուցահանդեսում Հայաստանը տաղավար չի ունեցել։
«Զբոսաշրջության կոմիտեն մշակում և իրականացնում է տարբեր մարկետինգային ռազմավարություններ, որոնք օգտագործվում են Հայաստանը տարբեր շուկաներում ճանաչելի դարձնելու և առաջխաղացնելու համար»,- նշել են կոմիտեից։
Այս տարվա համար մշակվել է ռուսական շուկայի հետ աշխատելու ռազմավարություն։ Այն ենթադրում է համագործակցություն պարբերականների հետ, թվային հարթակներում գովազդ, այդ թվում` ավիաուղիների հետ համագործակցության շրջականակներում, ինչպես նաև կազմակերպելու են ճանաչողական այցեր` ռուսական շուկային Հայաստանը ներկայացնելու նպատակով:
«Ռուսաստանը մեզ համար առաջնային շուկա է, այդ իսկ պատճառով մենք այս տարի ներդրումներ ենք կատարել շուկայի հետազոտմանն ուղղված խոշոր նախագծում, որը Ռուսաստանից ժամանած զբոսաշրջիկների պրոֆիլի մասին լիարժեք տեղեկատվություն ստանալու հնարավորություն կտա մեզ»,- ասված է կոմիտեի պատասխանում։
Հետազոտության արդյունքում ստացված տեղեկատվությունը կօգտագործվի ռուսական շուկայի համար առավել ճիշտ մարկետինգային ռազմավարություն ընտրելու համար, որը 2024 թվականից շարունակական կերպով կիրականացվի Ռուսաստանում Հայաստանն ու նրա զբոսաշրջային ներուժն առավել ճանաչելի դարձնելու նպատակով: