ԵՐԵՎԱՆ, 17 մարտի – Sputnik. Երևանի «Ֆիզգորոդոկ» թաղամասում սեփականության ապօրինի գրանցման փաստով քրեական հետապնդում է հարուցվել կադաստրի պետական կոմիտեի նախկին պաշտոնյայի ու ևս մեկ քաղաքացու նկատմամբ։ Տեղեկությունը հայտնում է ՀՀ գլխավոր դատախազության մամուլի ծառայությունը։
«Կադաստրի պետական կոմիտեի աշխատակազմի «Դավթաշեն» տարածքային ստորաբաժանման նախկին ղեկավար Ռ.Հ–ն, որն այդ պաշտոնը զբաղեցրել է 2004 թվականի հոկտեմբերի 1-ից մինչև 2006 թվականի հոկտեմբերի 1-ը, քաղաքացի Տ.Ա.-ի հետ նախնական համաձայնությամբ, նույն ստորաբաժանման աշխատակից Գ.Ս.-ի օժանդակությամբ, 2005 թվականի հունիսի 6-ին, անտեսելով ՀՀ վերաքննիչ քաղաքացիական դատարանի 2005 թվականի մարտի 29-ի թիվ 05-931 որոշումը, գրանցել է քաղաքացի Տ.Ա.-ի սեփականության իրավունքը՝ Երևան քաղաքի Ալիխանյան եղբայրներ փողոցին հարող տարածքում գտնվող 1976.1 քմ մակերեսով հողամասի և 50.8 քմ մակերեսով նկուղի նկատմամբ (հանրությանը հայտնի է որպես «Ֆիզգորոդոկ» թաղամաս)»,– նշված է հաղորդագրության մեջ։
Հետագայում՝ 2006 թվականի ապրիլի 28-ին, գույքն օտարվել է Ա.Բ.-ին։ 2006 թվականի հոկտեմբերի 13-ին այն վերավաճառվել է արդեն «Ռատկո» ՍՊԸ–ին:
Դատախազությունից տեղեկացնում են, որ հողամասի և նկուղի նկատմամբ սեփականության իրավունքի գրանցումների բոլոր 3 դեպքերը կատարվել են ՀՀ կառավարությանն առընթեր անշարժ գույքի կադաստրի պետական կոմիտեի «Դավթաշեն» տարածքային ստորաբաժանման ղեկավար-անշարժ գույքի պետական ռեգիստր Ռ.Հ.-ի կողմից:
«Ռ.Հ.-ի արարքի հետևանքով պետությանը պատճառվել է առանձնապես խոշոր չափերի՝ 117 մլն դրամի գույքային վնաս»,– նշված է դատախազության հաղորդագրության մեջ։
2023 թվականի մարտի 17-ին դատախազը հանրային քրեական հետապնդում է հարուցել Ռ.Հ.-ի և քաղաքացի Տ.Ա.-ի նկատմամբ՝ ՀՀ քրեական օրենսգրքի 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախություն):
Դատախազի որոշումն ուղարկվել է նախաքննություն իրականացնող քննիչին՝ մեղադրանք ներկայացնելու համար:
Հիշեցնենք` նախորդ տարի ամռանը «Ֆիզգորոդոկի» բնակիչները բողոքի ցույցեր էին անցկացնում` նշելով, որ այգու տարածքը ոչ իրավաչափ սեփականաշնորհվել է, ապա մի քանի անգամ օտարվել։ Ի վերջո, տարածքի հերթական սեփականատերը 2021 թվականի հուլիսի 29-ին Երևանի քաղաքապետարանից ստացել է շինարարության թույլտվություն և սկսել է բազմաբնակարան շենք կառուցել: Բնակիչների փաստաբանի խոսքով՝ այգու ընդհանուր տարածքը մինչ այդ ՀՀ ԿԳՄՍ նախարարությունը ճանաչել է պատմամշակութային արժեք, բայց հետո այգու վիճելի հատվածը հանվել է այդ ցանկից: