40 տարի անց ծանրամարտի Եվրոպայի առաջնությունը անցկացվելու է Հայաստանում

ԵՐԵՎԱՆ,16 մարտի – Sputnik. Ծանրամարտի Եվրոպայի առաջնության կազմկոմիտեի նախագահ Արայիկ Հարությունյանը և ՀՀ ԿԳՄՍ նախարարի տեղակալ Կարեն Գիլոյանը այսօր հանդիպել են լրագրողների հետ։

Երևանում կայանալիք ծանրամարտի Եվրոպայի առաջնությունը կրկնակի նշանակություն ունեցող մրցաշար է։ Հայաստանի մայրաքաղաքում մրցումների մասնակիցները բացի աշխարհամասի չեմպիոնի կոչման համար պայքարելը, մրցելու են նաև 2024 թվականին Փարիզի օլիմպիական խաղերի վարկանիշների համար։ Հետևաբար մրցումներին մասնակցելու են հին աշխարհամասին ուժեղագույն բոլոր ծանրորդները։

Հյաստանի Հանրապետության վարչապետի աշխատակազմի ղեկավար, ծանրամարտի Եվրոպայի 2023թ․ առաջնության կազմկոմիտեի նախագահ Արայիկ Հարությունյանը ծանրամարտի Եվրոպայի առաջնությունը Երևանում անցկացնելը համարում է 2023 թվականի բացառիկ իրադարձություն․

ԿԳՄՍ նախարարի տեղակալ Կարեն Գիլոյանի կարծիքով էլ Հայաստանը պարտավոր էր նման մրցաշար անցկացնել, քանի որ ծանրամարտի Հայաստանի հավաքականը ուժեղագույններից մեկն է աշխարհում․ «Եվրոպայի առաջնության անցկացումը Երևանում ես համարում եմ պատմական իրադարձություն, քանի որ մեր հավաքականը նախ լավագույններից մեկն է, բացի այդ էլ 1983 թվականին Երևանը ուներ նման մրցաշար անցկացնելու իրավունք, բայց դա տեղի չունեցավ։ Համոզված նշեմ, որ անկախ ամեն ինչից, ծանրամարտի Հայաստանի հավաքականը հերթական անգամ, այս դեպում արդեն սեփական հարկի տակ ամեն ինչ անելու է բարձր տեղեր գրավելու համար, և դա վերաբերվում է բոլոր այն քաշային կարգերին, որտեղ մեր հանրապետությունը ներկայացված է լինելու»- ասել է Կարեն Գիլոյանը։

Երևանում ապրիլի 15-23-ը կայանալիք մրցաշարում, ըստ նախնական հայտերի, մասնակցելու են 40 երկրների 500-ից ավելի ծանրորդներ։ Կժամանեն արդյոք Երևանը ադրբեջանցի մարզիկները, առայժմ հայտնի չէ։ Հայաստանի կառավարությունն ու Եվրոպայի առաջնության կազմկոմիտեն անվտանգության բոլոր երաշխիքները տվել են մրցումների բոլոր մասնակիցներին։ Իսկ ադրբեջանցիների ժամանման հետ կապված հարցերի պատասխանը կստանանք այսօր. մարտի 16-ը հայտերի ներկայացման վերջին օրն է։