ԵՐԵՎԱՆ, 14 մարտի – Sputnik. Այն, որ այսօր Ադրբեջանում նոր ակտիվությամբ են սկսել խոսել «Արևմտյան Ադրբեջանի» և ադրբեջանցի փախստականների` Հայաստան «վերադառնալու» մասին, հերթական անգամ ապացուցում է, որ Ադրբեջանը տարածքային նկրտումներ ունի ՀՀ ինքնիշխան տարածքների նկատմամբ։ Այսօր հրավիրված ասուլիսի ժամանակ այս հայտարարությունն արեց ՀՀ վարչապետ Նիկոլ Փաշինյանը։
«Եթե շատ անկեղծ լինենք, Լեռնային Ղարաբաղի հարցի փակուղի մտնելը հենց այդ պատճառով է տեղի ունեցել, որովհետև ակնհայտ է եղել, որ այս ագրեսիվ գործողություններից հրաժարվելու մտադրություն Ադրբեջանը չունի ոչ մի պարագայում։ Սա ՀՀ ինքնիշխան տարածքի նկատմամբ ապօրինի և ակնհայտ ոտնձգություն է, որը հակասում է Պրահայի և Սոչիի հայտարարություններին, Ադրբեջանը ագրեսիայի քաղաքականության նոր փուլ է սկսել»,– ասաց նա։
Լրագրողներից մեկն անդրադարձավ ադրբեջանական մամուլում տարածված տեղեկություններին, թե իբր Հայաստանից տեղահանված ադրբեջանցի փախստականների համայնքի ղեկավարը դիմել է ՀՀ վարչապետ Նիկոլ Փաշինյանին իրենց նախկին բնակության վայրեր վերադառնալու համար, և հիմա սպասում է կառավարության ղեկավարի պատասխանին։
Ի պատասխան Փաշինյանը հիշեցրեց, որ Հադրութից ու Շուշիից բռնի տեղահանվածները հաճախ կառավարության առջև բողոքի ցույցեր են անում և, ըստ նրա, ճիշտ են անում։
2020 թ. նոյեմբերի 9-ի եռակողմ հայտարարությամբ` ներքին տեղահանվածներն ու փախստականները պետք է վերադառնային Լեռնային Ղարաբաղ և հարակից շրջաններ ՄԱԿ–ի փախստականների հարցերի գլխավոր հանձնակատարի հովանու ներքո։
«Մինչև այսօր Հադրութի ժողովրդին ոչ մեկը չի առաջարկել վերադառնալ իրենց տներ, մենք այդ հարցն անընդհատ բարձրացնում ենք և շարունակելու են բարձրաձայնել»,– նշեց Փաշինյանը։
ՀՀ վարչապետն ընդգծեց, որ նույնը նաև Շուշիից տեղահանված հայությանն է վերաբերում։