ԵՐԵՎԱՆ, 14 մարտի – Sputnik. «Ռոսիա սեգոդնյա» մեդիախմբի գործադիր տնօրեն Կիրիլ Վիշինսկին ՄԱԿ–ի ԱԽ–ի նիստի ժամանակ պատմել է կիևյան իշխանությունների և ուկրաինական հասարակության այլ ներկայացուցիչների գործողություններում ռուսատյացության դրսևորումների մասին։ Նրա խոսքերն է մեջբերում ՌԻԱ Նովոստին։
Նա հիշեցրել է, որ 2022 թվականի ընթացքում ուկրաինական հեռուստաալիքների եթերում հակառուսական, մարդատյաց հորդորներ էին հնչում։
««24 ալիքի» լրագրող Ֆահրուդին Շարաֆմալն ուղիղ եթերում կոչ էր արել «հաշվեհարդար տեսնել ռուսաստանցիների հետ»` ոչնչացնելով նրանց ընտանիքներին ու երեխաներին», – ասել է Վիշինսկին։
Նա մեջբերել է լրագրողի խոսքերը, որը, դիմելով ռուսներին, հայտարարում էր. «Եթե մենք ստիպված լինենք կոտորել ձեր բոլորի ընտանիքներին, ես առաջիններից կլինեմ։ Փառք ազգին»։
«Ուկրաինացի բժիշկ, «Շարժական հոսպիտալ» նախագծի ղեկավար Գենադի Դրուզենկոն հորդորել է ամորձատել ՌԴ ռազմագերիներին, որովհետև «նրանք խավարասերներ են, ոչ թե մարդ»», – պատմել է Վիշինսկին։
Նա հիշեցրել է նաև Ուկրաինայում այսպես կոչված «սոցիալական գովազդի» մի տեսահոլովակի մասին, որտեղ աղջիկն ուկրաինական վերնաշապիկով, մանգաղը ձեռքին, գլխի վրա էլ պսակ` կտրում է ռուս զինվորի կոկորդն ու ասում. «Հիմա արյունոտ հունձ ենք անում։ Բոլորիդ մահ է սպասում»։
«Եվ այդ հայտարարություններն այսօր գործնականում իրականացվում են. դա երևում է ՌԴ ռազմագերիներին գնդակահարելու, նրանց հետ անմարդկային վարվելու, Դոնբասի ռուսախոս խաղաղ բնակչությանը գնդակոծելու փաստերի վրա», – ընդգծել է Վիշինսկին։
Նա Անվտանգության խորհրդի անդամների ուշադրությունն է հրավիրել նաև մարտի 13–ին Գերագույն ռադայում խորհրդարանի հայտարարության նախագծին, որով առաջարկվում է Ռուսաստանի քաղաքական ռեժիմը պաշտոնապես «ռաշիզմ» անվանել։
«Որպես Ուկրաինայում հորինված այս երևույթի հատկանիշներ, պատգամավորներն առանձնացնում են Ռուսաստանի և ռուսաստանցիների ինքնամեծարումը այլ ժողովուրդների գոյությունը մերժելու և/կամ բռնաճնշման հաշվին»։
Նրա խոսքով` ռուսների նկատմամբ այդ սուտը ոչ միայն Ուկրաինայում, այլև մյուս երկրներում պետք է անկեղծ տհաճություն և ատելություն առաջացնի Ռուսաստանի և ռուսների նկատմամբ ռուսատյացության արթնացման համար։