Առկա պայմաններում ՀՀ իշխանությունը չի արել հնարավոր ամեն ինչ, որպեսզի բանակը պատշաճ զինված լինի թշնամուն արժանի հակահարված տալու համար, հետևաբար Ադրբեջանը նորանոր պահանջներ է ներկայացնում` սպառնալով նոր հարված հասցնել Հայաստանին։ Sputnik Արմենիայի հետ զրույցում այս տեսակետը հայտնեց քաղաքագետ Կարեն Իգիթյանը։
Այսօր ասուլիսի ժամանակ ՀՀ վարչապետ Նիկոլ Փաշինյանը հայտարարեց, որ Լեռնային Ղարաբաղի հարցի փակուղի մտնելը տեղի է ունեցել այն պատճառով, որ Ադրբեջանն ագրեսիվ գործողություններից հրաժարվելու մտադրություն չունի ոչ մի պարագայում։ Ըստ նրա` նաև ՀՀ ինքնիշխան տարածքի նկատմամբ ակնհայտ ոտնձգությունը հակասում է Պրահայի և Սոչիի հայտարարություններին։ Ադրբեջանը ագրեսիայի քաղաքականության նոր փուլ է սկսել։
«Խոսելով հնարավոր էսկալացիայի ու պատերազմական ռիսկերի մասին` Փաշինյանը վկայակոչեց այն հեռոտարաբանությունը, որն առկա էր Ադրբեջանում 44-օրյա պատերազմից առաջ։ Փաշինյանը գուցե նաև նկատի ուներ հետախուզական տվյալները, որոնք վկայում են այն մասին, որ Ադրբեջանը պատրաստվում է մարտական գործողությունների»,– ասաց Իգիթյանը։
Նա հիշեցրեց, որ Ադրբեջանը դեռ 2020 թվականի նոյեմբերի 10–ից սկսել է պատրաստվել նոր էսկալացիայի։ 2021 թվականի մայիսյան ագրեսիան հեշտ ստացվեց, որովհետև մեր զինվորականները, որոշ տեղեկությունների համաձայն, նույնիսկ կրակելու հրաման չունեին, հետևաբար նման պայմաններում Ադրբեջանի համար բավականին հեշտ էր ուժ կուտակել` գրավելով նոր հարմար դիրքեր։
Նախորդ տարվա սեպտեմբերյան ռազմական գործողությունները մեծ հարված հասցրին Հայաստանի ռազմական ներուժին, իսկ գրավված նոր դիրքերը, ըստ նրա, հնարավորություն են ընձեռում նոր էսկալացիայի ու առաջխաղացման համար։
«Ադրբեջանի առավելագույն նպատակն առհասարակ Հայաստանը բնաջնջելն է, իսկ նվազագույն նպատակը` Սյունիքը գրավելը։ Ադրբեջանի բարձրաստիճան չինովնիկների հայտարարություններում կան կետեր, որոնք հնչել են նաև 44-օրյա պատերազմի նախաշեմին, և դա հայկական կողմի վրա հոգեբանական ճնշում գործադրելու նպատակ է հետապնդում»,– նշեց մեր զրուցակիցը։
Իգիթյանի դիտարկմամբ` նոր ռազմական գործողությունների դեպքում Թուրքիան ավերիչ երկրաշարժից հետո հաշվի կառնի այն հանգամանքը, թե ինչպիսի էսկալացիայի կգնա Ադրբեջանը` մե՞ծ, թե՞ փոքր։ Ըստ նրա` այստեղ կարող է գործել նաև շեղող պատերազմի էֆեկտը, այսինքն` նոր էսկալացիան Էրդողանը կարող է օգտագործել իր երկրի հասարակության ուշադրությունը հանապազօրյա խնդիրներից ու տնտեսական մեծ խնդիրներից շեղելու համար։