«Սասունցի Դավիթ» կայարանի մոտակայքում տղամարդու դի է հայտնաբերվել

ԵՐԵՎԱՆ, 11 մարտի – Sputnik. Այսօր առավոտյան Երևանի «Սասունցի Դավիթ» կայարանի մոտակայքում տղամարդու դի է հայտնաբերվել։ Տեղեկությունը հայտնում է shamshyan.com–ը։

Ըստ հաղորդագրության` ժամը 08:50-ի սահմաններում ոստիկանության Էրեբունու բաժինն ահազանգ է ստացել, որ կայարանի հետնամասում՝ Տիգրան Մեծ 86 հասցեին հարակից վայրում, տղամարդու դի կա:

Պարեկները պարզել են, որ մահացածը Երևանի բնակիչ 66-ամյա Վարազդատ Ա.-ն է:

Դատաբժշկի նախնական եզրակացության համաձայն` դիակի վրա բռնության հետքեր չեն եղել:

Դեպքի փաստով քննչական բաժնում նախաձեռնվել է վարույթ: Քննիչի որոշմամբ նշանակվել է դիակի դատաբժշկական փորձաքննություն։

Ոստիկանության Էրեբունու բաժնի քրեական հետախուզության բաժանմունքի ծառայողները ձեռք են բերել դեպքի վայրի հարևանությամբ տեղադրված տեսախցիկի տեսագրությունը, որով երևում է, թե ինչպես է տղամարդը միայնակ քայլում ու հանկարծամահ լինում: