ԵՐԵՎԱՆ, 11 մարտի – Sputnik. Երևանի ավագանու մշակույթի, կրթության և սոցիալական հարցերի մշտական հանձնաժողովին ներկայացվել է մի նախագիծ, ըստ որի` նախատեսվում է Ֆրանսիայի հրապարակի կենտրոնում տեղադրել Շառլ Ազնավուրի արձանը, իսկ Օգյուստ Ռոդենի Ժյուլ Բաստիեն Լըպաժի քանդակը տեղափոխել այլ վայր: Տեղեկությունը հայտնում է Երևանի ավագանու անկախ անդամ Իզաբելլա Աբգարյանը։
«Ըստ պայմանագրի՝ Ռոդենի քանդակը պետք է լինի հենց Ֆրանսիայի հրապարակում, ուստի այս պահին դիտարկվում է երկու վայր. մեկը օպերայի շենքի մոտի անցումից, երբ անցնում ենք դեպի Կոնսերվատորիայի պուրակ, փողոցը կիսող մեջտեղի հատվածում, մյուսը՝ Սարյանի պուրակի առջևի հատվածում, որտեղ տաքսիներ էին կայանում»,– գրել է նա ֆեյսբուքյան իր էջում:
Ավագանու անդամը հետաքրքրվել է, թե ինչու Ազնավուրի արձանը չի տեղադրվում Ազնավուրի հրապարակում, ինչն ավելի տրամաբանական կլիներ, մշակույթի վարչության պետը պարզաբանել է, որ արձանը շատ մեծ է լինելու, ուստի այդ հրապարակում հարմար հատված չկա:
Աբգարյանը նշել է, որ նույն արձանից տեղադրվելու է նաև Ֆրանսիայում:
Հիշեցնենք` Ռոդենի հեղինակած արձանը 2011 թվականին Հայաստանին է նվիրել Ֆրանսիայի նախկին նախագահ Նիկոլա Սարկոզին` որպես բարեկամության խորհրդանիշ Հայաստանի ու Ֆրանսիայի միջև: