ԵՐԵՎԱՆ, 10 մարտի – Sputnik. Team ընկերությունների խումբն առաջիկայում մուտք կգործի էլեկտրոմոբիլների լիցքավորման կայանների շուկա, ինչպես նաև կգործարկի Team Pay էլեկտրոնային վճարահաշվարկային ծրագիրը։ Այս մասին «DigiTec 2022» բարձր տեխնոլոգիաների համաժողովի ժամանակ լրագրողների հետ ճեպազրույցում ասաց Team ընկերությունների խմբի համանախագահ Հայկ Եսայանը։
«Էլեկտրոմոբիլների մեր լիցքակայանները տարբերվելու են` դրանք ավտոմատ նույնականացվելու են մեքենայի հետ։ Այսինքն` կարիք չի լինի «չարջերը» միացնել հավելվածով, նույնականացնելու։ Սա լինում է ավտոմատ կերպով ու անմիջապես սկսում է լիցքավորվել։ «Չարջերը» ներքին շուկայի համար են նախատեսված և շատ շուտով հասանելի կդառնան։ Այս տարի 20 արագ լիցքավորման կայան (fast charger) կտեղադրվի ՀՀ տարբեր քաղաքներում, որպեսզի ցանկացած մեքենա 40 րոպեում կարողանա լիցքավորել մեքենան»,– ասաց Եսայանը։
Նա շեշտեց, որ 220 V լարման ավելի քան 50 լիցքավորման կայան նույնպես կտեղադրվեն հանրապետության տարբեր հատվածներում, սակայն դրանք մի փոքր ավելի դանդաղ կլիցքավորեն։
Անդրադանռալով հեռահաղորդակցության ոլորտին, Եսայանը տեղեկացրեց, որ այսօրվանից ընկերությունը կստանա 5G հնարավորությամբ 700 MHz հաճախականություն. որոշումը կկայացվի Հանրային ծառայությունները կարգավորող հանձնաժողովի նիստի ժամանակ։
«Շուրջ 1-2 տարվա կառուցումից հետո արդեն 5G հնարավորություն կունենանք Երևանում և մի քանի մարզկենտրոնում։ Միայն մենք ենք դիմել այդ հաճախականությունը ստանալու համար, չգիտեմ ինչու՝ մյուս օպերատորները չեն դիմել: Մենք միտված ենք օգտագործել այդ հաճախականությունը` 5G ցանցի հասանելիությունն ապահովելու համար»,– ասաց Եսայանը։
Նրա խոսքով` հաջորդ տարվանից նոր ընկերություններին հնարավորություններ կտրվեն Team–ի ցանցից օգտվելու և իրենց նորարարական լուծումները կիրառելու` բաժանորդներին ծառայություններ տրամադրելու համար։