«Լուսավոր Հայաստան» կուսակցությունում «Քաղաքացիական պայմանագրի» դաշինքով Երևանի ավագանու ընտրություններին մասնակցելու հարցի քննարկում առհասարակ չի եղել։ Այս մասին Sputnik Արմենիայի հետ զրույցում ասաց Երևանի ավագանու «Լույս» խմբակցության ղեկավար, ԼՀԿ-ի ընտրացուցակը գլխավորող Դավիթ Խաժակյանը։
Մամուլն ավելի վաղ գրվել էր, որ «Լուսավոր Հայաստան» կուսակցության քաղաքապետի թեկնածու Դավիթ Խաժակյանը չի բացառում, որ Երևանի ավագանու ընտրություններին մասնակցեն ՔՊ թեկնածու Տիգրան Ավինյանի հետ դաշինքով:
«Պարզապես մեզ հարցրել են` բացառու՞մ ենք արդյոք, որ նման բան կարող է լինել, իսկ ես պատասխանել եմ, որ նման սցենարը բացառված չէ, սակայն դա մեզ մոտ չքննարկված սցենար է այն պարզ պատճառով, որ ընտրություններին դեռ մի քանի ամիս կա։ Հիմա մենք կենտրոնացել ենք կազմակերպչական աշխատանքների վրա։ ՔՊ-ն իշխող ուժ է, իսկ մենք Երևանի ավագանիում ընդդիմադիր ենք»,– ասաց Խաժակյանը։
Նա կարծում է, որ դաշինքով, թե առանց դաշինքի ընտրություններին մասնակցելու հարցն ավելի ակտուալ կլինի քննարկել, երբ պարզ լինի մասնակիցների թվաքանակը։
Առայժմ ընտրություններին մասնակցելու հայտարարությամբ հանդես են եկել ՔՊ–ն` Տիգրան Ավինյանի գլխավորությամբ, ԼՀԿ–ն` Դավիթ Խաժակյանի գլխավորությամբ, ինչպես նաև որոշ կուսակցություններ, որոնց էլեկտորալ կշիռն, ըստ Խաժակյանի, դեռ պարզ չէ։ Իսկ ահա խորհրդարանական երկու ընդդիմադիր քաղաքական ուժերն այդ մասին ընդհանրապես չեն հայտարարել։
«Այստեղ կանխակալության խնդիր չկա, ամեն ինչ ընթացքում է պարզ դառնալու։ Բնական է` ցանկացած ուժ կցանկանա իր առանձին ցուցակով մասնակցել ընտրություններին։ Ամեն ինչ հստակ կլինի այն ժամանակ, երբ ի հայտ գա մասնակցային ամբողջական ներկապնակը»,– ասաց մեր զրուցակիցը։
ԼՀԿ-ն բացառում է որևէ համագործակցություն բոլոր այն ուժերի հետ, որոնք ընտրությունները պատկերացնում են ոչ քաղաքական գործընթաց, առևտրի առարկա կամ փող բաժանելու միջոց։ ԼՀԿ–ն սկզբունքային տարաձայնություններ ունի նախկին իշխանությունների հենարան հանդիսացող ուժերի հետ, և եթե «Հայաստան» դաշինքն ու ՀՀԿ-ն որոշեն որևէ ձևաչափով մասնակցել ընտրություններին, իրենք վստահաբար նրանց հետ անելիք չունեն։ Իսկ այն ուժերը, որոնց հետ ԼՀԿ–ն քաղաքական ճանապարհ է անցել, նրանց հետ համագործակցությունը կարող է տարբեր ֆորմատներում տարբեր ձևեր ստանալ։
Խաժակյանը տեղեկացրեց, որ իրենք վերակազմավորել են ԼՀԿ-ի Երևանի կուսակցական խորհուրդը և հիմա մայրաքաղաքի վարչական շրջաններում ձևավորում են տարածքային կառույցներ։ Մշակման փուլում է նաև մայրաքաղաքի զարգացման 2023-28 թվականների ծրագիրը, որի տարբեր հատվածներ հընթացս կհրապարակեն։