Այս օրն այն մասին չէ, որ կանայք փխրուն են ու խոցելի. Փաշինյանի ուղերձը տոնի առթիվ

Կառավարության ղեկավարը գլուխ է խոնարհում այն կանանց առջև, որոնց ամուսիններն ու որդիներն իրենց կյանքը տվեցին հանուն հայրենիքի։
Sputnik
ԵՐԵՎԱՆ, 8 մարտի – Sputnik. Արդեն բավական երկար ժամանակ կանայք մեր երկրի բնակչության մեծամասնությունն են և այսօր մեր երկրում ավելի հաճախ կանայք ստանձնում են դերակատարումներ, պատասխանատվություններ ու պաշտոններ, որոնք աննախադեպ են մեր երկրի պատմության համար։ Սա է շեշտել ՀՀ վարչապետ Նիկոլ Փաշինյանը Կանանց միջազգային օրվա առիթով հղած իր շնորհավորական ուղերձում։
Կառավարության ղեկավարը վստահ է, որ կանանց հսկայական պոտենցիալը լիարժեք չօգտագործելը` որպես երկրի զարգացման գրավական, նշանակում է լինել անհեռատես: Կանայք այսօր ավելի շատ են ներգրավվում տնտեսական գործունեության մեջ, պետական կառավարման և տեղական ինքնակառավարման ոլորտում, դատաիրավական և իրավապահ համակարգերում, նաև զինված ուժերում:
«Հանրային, պետական կյանքի բոլոր ոլորտներում կանանց դերակատարման ընդլայմանը շատերը հոռետեսությամբ են վերաբերվում՝ ընդգծելով, որ կինը հայկական ավանդական ընտանիքի հենասյունն է: Սա, իհարկե, ճիշտ է և աներկբա: Բայց հայկական ավանդական ընտանիքի նույնպիսի հենասյուն է տղամարդը,ու ոչ ոք չի անհանգստանում, երբ տղամարդը ծառայում է բանակում, ոստիկանությունում, զբաղվում է տնտեսական գործունեությամբ կամ ակտիվ հանրային-քաղաքական կյանք է վարում»,– շեշտում է գործադիրի ղեկավարը։
Միևնույն ժանանակ նա հավելում է, որ պետությունը հատուկ հոգածության առարկա պետք է դարձնի մայրությունը, ինչը և հետևողականորեն արվում է։
Փաշինյանն իր շնորհավորական ուղերձում հատուկ անդրադարձել է այն կանանց, որոնց որդիներն ու ամուսիններն իրենց կյանքը տվեցին հանուն հայրենիքի:
Ուղերձի վերջում վարչապետը հատուկ ընդգծում է` Կանանց միջազգային օրն այն մասին չէ, որ կանայք փխրուն են ու խոցելի: Այս օրն այն մասին է, որ կանայք կարող են ավելին:
«Խոնարհվում եմ այն կանանց հիշատակի առաջ, որոնք իրենց կյանքը զոհեցին». Փաշինյանի ուղերձը