ԵՐԵՎԱՆ, 8 մարտի – Sputnik. Այսօր, ժամը 10։00-ի դրությամբ, Հայաստանում գրանցված կարմրուկի լաբորատոր հաստատված դեպքերի թիվը հասել է 39-ի։ Տեղեկությունը հայտնում է առողջապահության նախարարության մամուլի ծառայությունը։
Վարակվածներից 18-ը հոսպիտալացված է, 14-ը չի հոսպիտալացվել, 7-ը դուրս են գրվել:
«Հիվանդների առողջական վիճակը գնահատվում է միջին ծանրության, 2-ինը՝ ծանր»,– տեղեկացնում են նախարարությունից։
Նշվում է, որ 39 վարակվածից 36-ը պատվաստված չէ, իսկ 3-ը պատվաստված է միայն մեկ դեղաչափով։
Հիշեցնենք՝ մարտի 3-ին հայտնի դարձավ, որ Հայաստանում արձանագրվել է լաբորատոր հաստատված կարմրուկի 11 դեպք։ Մարտի 6-ի դրությամբ կարմրուկի լաբորատոր հաստատված դեպքերի թիվը հասել է 20-ի։
Պատվաստումների ազգային օրացույցով կարմրուկի դեմ պատվաստումները նախատեսված են 1 և 6 տարեկան երեխաների համար:
Կարմրուկի դեմ պլանային պատվաստումներ չստացած երեխաների ծնողներին գերատեսչությունից հորդորում են դիմել հաշվառման պոլիկլինիկա և պատվաստել երեխաներին:
Միաժամանակ պատվաստման են ենթակա նաև կարմրուկով հիվանդների հետ շփված այն անձինք, որոնքկարմրուկի դեմ չեն ստացել 2 դեղաչափ պատվաստում:
Կարմրուկը սուր վիրուսային, խիստ բարձր վարակելիությամբ հիվանդություն է, որը բնորոշվում է ցանային երևույթներով, չոր հազով, ջերմությամբ և այլն: Վարակը փոխանցվում է օդային ճանապարհով։