«Քանոնով գծած ամրաններ». հայ գիտնականների գյուտը մրցանակի է արժանացել Քուվեյթում

ԵՐԵՎԱՆ, 7 մարտի – Sputnik. Տեխնիկական գիտությունների դոկտոր, պրոֆեսոր Վարդգես Գրիգորյանի հայտնագործությունը փետրվարի կեսերին Քուվեյթի գիտական ակումբի ցուցահանդեսում արծաթե մեդալ է ստացել:

Ինչպես Sputnik Արմենիային հայտնեց Ճարտարապետության և շինարարության Հայաստանի ազգային համալսարանի տեխնոլոգիայի և շինարարության կազմակերպման ամբիոնը ղեկավարող Գրիգորյանը, ցուցահանդեսին ներկայացված են եղել 183 գյուտեր և տեխնոլոգիաներ 43 երկրից։

Մրցանակները մրցանակակիրներին հանձնել են Գիտական ակումբի նախագահը և Քուվեյթի էմիրը։

Ասպիրանտ Աշոտ Մխիթարյանի խոսքով (որը Գրիգորյանին ուղեկցել է ցուցահանդեսում և օգնել է ներկայացնել աշխատանքը)` այսօր շինհրապարակներում ամրանները միշտ չէ, որ երկաթբետոնի մեջ անհրաժեշտ խորության վրա են տեղադրում։ Ամրանի տրամագծից կախված` բետոնի պաշտպանիչ շերտը դրա համար պետք է տարբեր լինի:

Դրա հաստությունը խախտելու դեպքում կարող են խնդիրներ առաջանալ. եթե բետոնը քիչ է, ամրանները օդից և խոնավությունից ժանգոտվում են, իսկ եթե շատ է, ամրանների կպչունությունը բետոնի հետ բավականաչափ ուժեղ չի լինում: Այդ պատճառով շատ կարեւոր է ամրանները շարել «քանոնով գծած» ուղիղ։ «Ինչը միշտ չէ, որ հեշտ է և մշտական վերստուգում է պահանջում»,– նշեց Մխիթարյանը։

Դրա համար գոյություն ունեն որոշակի տրամագծով ամրանների ֆիքսատորներ։ Սակայն ֆիքսատորը, որը ամրանների բոլոր ամենատարածված տրամագծերի «հավաքածուն» ունի (2-30մմ և ավելի) օգնում է շատ ավելի արագ լուծել խնդիրը։ Տեղադրելիս ամրանն ինքն իրեն ընկնում է իր տրամագծին համապատասխան ակոսի մեջ, և դրա վերևում բետոնի հենց այնպիսի շերտ է լինում, որը նախատեսված է շինարարական նորմերով։

«Մենք որոշեցինք ֆիքսատորները պատրաստել պլաստիկի թափոններից, ինչը զգալիորեն էժանացնում է դրանք և բնապահպանական խնդիրներ է լուծում»,-հավելեց նա:
Հայաստանի վաստակավոր շինարար Գրիգորյանի խոսքով` սխալ տեղադրման պատճառով ամրանների կոռոզիան կարող է ոչ միայն կրճատել շենքի «կյանքը», այլև ավելացնել ավերածությունները երկրաշարժերի ժամանակ։

Գյուտարարները նոր դետալը (որը փոքր է ու էժան, բայց կարող է բարձրացնել շենքերի երկարակեցությունը) ներկայացնում են իրենց գործընկերներին, ինչպես նաև մասնավոր բիզնեսի ներկայացուցիչներին։

Նշենք, Գրիգորյանն իր ստացած մեդալը որոշել է նվիրել համալսարանին։