ԵՐԵՎԱՆ, 7 մարտի – Sputnik. «Միսս Երևան» գեղեցկության մրցույթի եզրափակիչ փուլում ժյուրիի անցկացրած քվեարկության արդյունքում հաղթող ճանաչվեց Անի Պետրոսյանը։
Անի Պետրոսյան
© Sputnik / Aram Nersesyan
Առաջին վիցեմիսս ճանաչվեց Մելինա Գիգոյանը, երկրորդ վիցեմիսս` Մարիամ Մելիքյանը։ «Հանդիսատեսի համակրանք» մրցանակին արժանացավ Լիլիթ Գևորգյանը։ Բոլոր մասնակիցներին շնորհվեց «Երևանի սիրուն աղջիկ» տիտղոսը։
«Մոդելային սպարեզը ինձ համար կյանքի նոր փուլ է։ Կարծում եմ՝ շատ լավ կստացվի իմ քայլերն այստեղ։ Ես ապահով ձեռքերում եմ»,- Sputnik Արմենիայի հետ զրույցում ասաց Անի Պետրոսյանը։
Նրա նպատակն ու երազանքը պարային դպրոց հիմնելն է, որտեղ հայկական պարարվեստի միջոցով կկարողանա հայրենիքի ու հայկական մշակույթի հանդեպ սեր սերմանել գալիք սերունդներին։
Անին իր գլխավոր մրցակից Մելինա Գիգոյանին մաղթեց ավելի մեծ բեմեր ու բազում հաղթանակներ։
«Միսս Երևան» մրցույթ
© Sputnik / Aram Nersesyan
«Միսս Երևան» գեղեցկության մրցույթի հաղթողը թագից բացի ստացավ նաև 7–օրյա ուղևորություն դեպի նորաձևության մայրաքաղաքներ Միլան, Փարիզ։
Նշենք, որ գեղեցկության մրցույթի թագի համար պայքարում էին 19 գեղեցկուհիներ։
«Միսս Երևան» մրցույթի մասնակիցները
© Sputnik / Aram Nersesyan
Մինչ եզրափակիչ փուլը մրցույթի մասնակիցները մեկ ամիս շարունակ մասնակցել էին դեֆիլեի, էթիկայի և մարզումների դասերի։
Հիշեցնենք, որ «Միսս Երևան» գեղեցկության մրցույթի հաղթողն ամբողջ տարվա ընթացքում մասնակցում է Երևանում կայանալիք բարեգործական, սոցիալական, նորաձևության, սպորտի և զբոսաշրջության բնագավառի ծրագրերին:
Ըստ պայմանագրի` մրցույթում հաղթողը մեկ տարի ամուսնանալու իրավունք չունի և չի կարող համագործակցել մոդելային ասպարեզի այլ կազմակերպությունների հետ, եթե առաջարկը չի արել հենց մրցույթի կազմակերպիչը։
Ժյուրիի կազմում էին «Մոսկվայի տուն» մշակութային-գործարար կենտրոնի գլխավոր տնօրեն Վահրամ Կարապետյանը, երգիչ, Երևանի մշակույթի և արվեստի պետական քոլեջի տնօրեն Վրեժ Կիրակոսյանը, դերասանուհի Օլյա Հակոբյանը, ոճաբան Մայա Պողոսյանը, Միսս Երևան 2019 Անգելինա Տատանյանը, ֆիթնես մարզիչ Վլադ Խառատյանը, ոճաբան Սարգիս Մկրտչյանը և «N Ayva» բժշկական էսթետիկ կենտրոնի տնօրեն Նարինե Այվազյանը։