ԵՐԵՎԱՆ, 7 մարտի – Sputnik. Ամերիկացիների թելադրանքով Ուկրաինան ուզում է պատերազմի մեջ ներքաշել Բելառուսին, բայց Մինսկը հակամարտության մեջ չի մտնի։ Այս մասին, «Բելտայի» փոխանցմամբ, հայտարարել է Բելառուսի նախագահ Ալեքսանդր Լուկաշենկոն։
«Եթե նրանք հույս ունեն, չէ՞ որ ես գիտեմ, որ իրենք ուզում են ամերիկացիների հրահանգով մեզ պատերազմի մեջ ներքաշել, եթե կարծում են, որ այդ մարտահրավերը նետելով, մեզ վաղը կներքաշեն այն պատերազմի մեջ, որն այսօր գնում է արդեն ամբողջ Եվրոպայում, սխալվում են», – ասել է Լուկաշենկոն։
Նա երկիրը լքածներին նախազգուշացրել է, որ պատրաստվեն, քանի որ Բելառուսի իշխանությունները գիտեն` ինչ է պետք անել։
«Եվս մեկ անգամ ուզում եմ ընդգծել, հատկապես տեղի ստահակների համար և նրանց համար, ովքեր փախել են. նրանք բոլորը բացահայտված են, մենք նրանց կգտնենք, այնտեղ` արտերկրում։ Կրկնում եմ` փախածների համար. պատրաստվեք, մենք արդեն եկել ենք ձեզ մոտ։ Եվ մի՛ ոռնացեք։ Եվ այդ մեսենջերներում գրառումներ մի՛ կատարեք։ Մեր նյարդերն ամուր են, մենք գիտենք` ինչ է պետք անել», – ասել է Բելառուսի նախագահը։
Այսօր ավելի վաղ Լուկաշենկոն հայտնել էր «ուկրաինական հատուկ ծառայությունների ահաբեկչի և նրա հանցակիցների» ձերբակալման մասին, որոնք առնչություն ունեն Մինսկի մերձակայքում գտնվող օդանավակայանում ռուսական ДРЛО А-50 ինքնաթիռի նկատմամբ իրականացրած դիվերսիոն փորձին։
Նա պատմել է, որ դիվերսիայի փորձի մասնակից է եղել Կիևի կողմից հավաքագրված ռուսաստանցին, որը բնակվել է Ղրիմում և ուկրաինական անձնագիր է ունեցել։
Նախագահի խոսքով` դիվերսանտին նախապատրաստել են ՈւԱԾ-ի ներկայացուցիչները` կիրառելով ամենաբարձր տեխնոլոգիաները։
Լուկաշենկոն հայտարարել է, որ դիվերսիայի նախապատրաստման ժամանակ անօդաչուներ են օգտագործվել։ Բելառուսի նախագահը հայտարարել է, որ դիվերսիայի հետևանքով А-50 ինքնաթիռը լուրջ չի տուժել, սակայն Մինսկը խնդրել է ՌԴ-ին փոխարինել այն։