ԵՐԵՎԱՆ, 5 մարտի - Sputnik. Սերբիայի նախագահ Ալեքսանդր Վուչիչը, Կատարում պատասխանելով լրագրողների հարցերին, «բացահայտ սուտ» է անվանել Բելգրադի կողմից Կիևին զենք վաճառելու մասին լուրերը։ Այս մասին գրում է ՌԻԱ Նովոստին։
Նախագահը նշել է, որ Սերբիան ռազմական արտադրանք չի մատակարարում ո՛չ Ուկրաինային, ո՛չ էլ Ռուսաստանին։
Ավելի վաղ Սերբիայի պաշտպանության նախարարությունից ՌԻԱ Նովոստիին հայտնել էին, որ Ուկրաինա զինամթերք իրենք չեն մատակարարել:
«Բացահայտ սուտ է։ Սերբիան ոչ մեկին զենք չի ուղարկել։ Մեր երկիրը զինամթերք արտադրում է և վաճառում, մենք ունենք բազմաթիվ պաշտպանական արդյունաբերական ձեռնարկություններ։ Իսկ երբ զինամթերք ես արտադրում, դրանք մի օր հայտնվում են հակամարտության գոտում, բայց մենք ոչ մի միավոր զենք կամ զինամթերք չենք վաճառել ո՛չ Ռուսաստանին, ո՛չ Ուկրաինային»,–հայտարարել է Սերբիայի նախագահը։
Նա հիշեցրել է, որ սերբական պաշտպանական արդյունաբերության արտադրանքը մատակարարվում է միայն թույլատրված օգտատերերին, այսինքն՝ առանց միջազգային սահմանափակումների պետություններին։
«Ասում են, թե մենք Թուրքիայի միջոցով ենք արտահանել զենքը։ Բայց մենք իմանալով, որ կա հավանականություն, որ արտադրանքի մի մասը կուղարկվի հակամարտության կողմերից որևէ մեկին, մենք ասել ենք` այլևս Թուրքիային վաճառված զենքը չենք արտահանելու։ Էլ ինչ եք ուզում մեզանից»,- ասաց Վուչիչը:
ՌԴ ԱԳՆ պաշտոնական ներկայացուցիչ Մարիա Զախարովան մի քանի օր առաջ հայտնել էր, որ Ռուսաստանը Սերբիային կոչ է անում պարզաբանել Ուկրաինային զենքի հնարավոր մատակարարումների հետ կապված լուրերը։ Նրա խոսքով՝ դա չափազանց կարևոր թեմա է երկկողմ հարաբերությունների համար: