ԵՐԵՎԱՆ, 5 մարտի - Sputnik. Ռուսաստանում մի քանի ամիս առաջ ԱԹՍ-ների ստեղծման ոլորտում մեծ շարժում է մեկնարկել։ Այս մասին KP.RU-ի հետ զրույցում հայտարարել է «Ռենովացիա» ԱԹՍ-ների արտադրությամբ զբաղվող ընկերության ղեկավար, տեխնիկական գիտությունների թեկնածու Սերգեյ Տովկաչը։
Նրա խոսքով՝ իշխանությունները սկսել են ակտիվորեն համագործակցել մասնավոր ընկերությունների հետ, սակայն ժամանակ է պետք նրանց աշխատանքի առաջին արդյունքները տեսնելու համար։
«Մեզ մոտ ոչ ոք չի քնում։ Մոսկվայից 400 քմ շառավղով` մարզերում աշխատանքը եռում է։ Հենց այս պահին բազմաթիվ «անակնկալներ» են պատրաստվում։ Չեմ կարող խոսել դրանց մասին, կասեմ միայն, որ մի քանիսն ուսումնասիրել եմ։ Եվ կասեմ, որ այնտեղ ամեն ինչ լավ է։ Բարձր մակարդակ է», - ասել է Տովկաչը։
Պարբերականի զրուցակիցը կարծիք է հայտնել, որ «Գերան» ռուսական անօդաչուն լավ մշակված սարքեր ունի․ այն օժտված է արդյունավետ ընդունիչով և արբանյակային նավիգացիայով, որն աշխատում է ոչ միայն GPS-ով, այլև պաշտպանված է այսպես կոչված «խլացուցիչներից»։