ԵՐԵՎԱՆ, 5 մարտի - Sputnik. Մեծ Բրիտանիայի հատուկ նշանակության ուժերին արգելել են զինվորական հեռախոսների վրա օգտագործել TikTok չինական հավելվածն ու այլ սոցցանցներ։ Այս մասին հայտնում է Daily Mail-ը։
Բացի այդ, լրտեսության աճող մտահոգությունների պատճառով հատուկ ջոկատայիններին խորհուրդ են տվել TikTok-ը չօգտագործել նաև անձնական սմարթֆոնների վրա։
Արգելքը նախաձեռնել էր SAS հետախուզության և անվտանգության ստորաբաժանումը` ելնելով այն մտավախություններից, որ Չինաստանն ու Ռուսաստանը կարող են սոցցանցի օգնությամբ նույնականացնել հատուկ նշանակության զորքերի մարտիկներին, ինչպես նաև այն վայրերը, որտեղ SAS-ը գաղտնի գործողություններ է իրականացնում։
Հայտնում են, որ Մեծ Բրիտանիայի հատուկ նշանակության զորքերը սերտ համագործակցում են ՄԻ5 և ՄԻ6 հետախուզական ծառայությունների հետ, իսկ տվյալ ստորաբաժանման անձանց ինքնությունը պետական գաղտնիք է․ նրանց անունները, օրինակ, չեն կարող նշվել ԶԼՄ-ներում։
Ավելի վաղ Politico պարբերականի հետ զրույցում Մեծ Բրիտանիայի գիտության, նորարարության և տեխնոլոգիաների նախարար Միշել Դոնելանը հայտարարել էր, որ Լոնդոնը մտադիր չէ ԵՄ-ի և ԱՄՆ-ի օրինակին հետևելով արգելել չինովնիկներին աշխատանքային հեռախոսների վրա օգտագործել TikTok հավելվածը։ Նա հավելել էր, որ TikTok-ի արգելքը վճռական քայլ է, որը «էական ապացուցողական բազա» է պահանջում, որը Բրիտանիայի իշխանությունները չունեն։