ԵՐԵՎԱՆ, 5 մարտի - Sputnik. Ոստիկանության ծառայողները մարդատար մեքենայով էին երթևեկում, Արցախի կողմից դեպի ոստիկանական կետ։ Մեքենայում զենք, զինամթերք կամ ռազմամթերք չի եղել՝ ընդհանրապես։ Իր տարածած հայտարարության մեջ գրել Արցախի պետնախարար Գուրգեն Ներսիսյանը։
«Ադրբեջանը շտապել է կեղծ տեղեկություն տարածել այն մասին, թե իբր իրենց կողմից վնասազերծվել է Հայաստանի Հանրապետությունից Արցախ զենք տեղափոխող մեքենան։ Սա բացահայտ սուտ է և միջազգային հանրությանը մոլորեցնելու, խաբելու, իրականությունը կեղծելու հերթական փորձ»,– գրել է նա։
Նա տեղեկացրել է, որ տեղի ունեցած դեպքի հանգամանքների վերաբերյալ Արցախի Հանրապետության իրավասու մարմինները ունեն անհերքելի ապացույցներ, տեսագրություններ ու լուսանկարներ, որոնք ամենակարճ ժամկետում ԱՀ արտաքին գործերի նախարարության միջոցով կներկայացվեն միջազգային լսարանին։
Արցախի պետնախարար Գուրգեն Ներսիսյանը հիշեցրել է նաև, որ վերջին օրերին Ադրբեջանի զինված ուժերն ակտիվություն են ցուցաբերում շփման գծի տարբեր ուղղություններով, թիրախավորում են բնակավայրերի անվտանգությունն ապահովելու նպատակով տեղադրված տեսախցիկները` վնասում կամ ոչնչացնում դրանք։
Հիշեցնենք` այսօր առավոտյան՝ ժամը 10։00-ի սահմաններում, ադրբեջանական զինուժի դիվերսիոն խումբը «Խայփալու» կոչվող տեղանքում թիրախավորել և կրակ է բացել ոստիկանության անձնագրային և վիզաների վարչության անձնակազմի հերթափոխի մեքենայի վրա։
Արդյունքում` զոհվել է երեք ոստիկան, մեկը` վիրավորվել է։