ԵՐԵՎԱՆ, 4 մարտի - Sputnik. Խաչի լեռնանցքը և Վերին Լարսը երկու ուղղություններով ամբողջությամբ փակվել են բոլոր տեսակի տրանսպորտային միջոցների համար։ Այս մասին Sputnik Արմենիային հայտնեց Ռուսաստանում ՀՀ դեսպանության մաքսային կցորդ Վահան Հակոբյանը։
Ավելի վաղ հայտնել էինք, որ օդերևութաբանների կանխատեսումներով` այս հատվածում կարող է առատ ձյուն տեղալ, ինչը կավարտվի մարտի 6–ին։ Առավելագույն տեղումներ են սպասվում մարտի 5–ին և 6–ին։
Հիշեցնենք, որ Ռազմավիրական ճանապարհը միակ ցամաքային ուղին է, որը Հայաստանը կապում է Ռուսաստանի հետ։ Այն պարբերաբար փակվում է վատ եղանակի պատճառով։
Վրաստանը Մցխեթ–Ստեփանծմինդա–Լարս ավտոճանապարհի ամենավտանգավոր հատվածը (Գուդաուրի–Կոբի) շրջանցող ճանապարհ է կառուցում։ Խոսքը 9–կիլոմետրանոց թունելի մասին է։