ԵՐԵՎԱՆ, 4 մարտի – Sputnik. ՀՀ գլխավոր դատախազությունում 3 տարի առաջ ձևավորված Ապօրինի ծագում ունեցող գույքի բռնագանձման գործերով վարչությունում մինչ օրս նախաձեռնել է 374 ուսումնասիրություն, որից ՀՀ հակակոռուպցիոն դատարան է ներկայացվել 29 հայցադիմում։ Այս մասին ի պատասխան Sputnik Արմենիայի հարցման հայտնում են ՀՀ գլխավոր դատախազությունից։
Նշվում է, որ հայցադիմումներն ընդունվել են վարույթ և գտնվում են նախնական դատական քննության փուլում:
«29 հայցադիմումներով ՀՀ գլխավոր դատախազությունը պահանջում է բռնագանձել ապօրինի ծագում ունեցող 269 անշարժ և 59 շարժական գույք, 59 ընկերությունում մասնակցություն, ինչպես նաև ընդհանուր 62.522.071.224 ՀՀ դրամի, 11.070.481 ԱՄՆ դոլարի և 150.000 եվրոյի չափով գումար»,- հայտնում են դատախազությունից՝ հավելելով, որ ներկայացված հայցադիմումներով ՀՀ հակակոռուպցիոն դատարանի կողմից գործն ըստ էության լուծող վերջնական դատական ակտ դեռևս չի կայացվել»,–ասվում է դատախազության պատասխանում:
Միևնույն ժամանակ դատախազությունից նշել են, որ ՀՀ գլխավոր դատախազության Ապօրինի ծագում ունեցող գույքի բռնագանձման գործերով վարչությունը հայցապահանջ է ներկայացրել 22 ներկա և նախկին պաշտոնյաների ու վերջիններիս փոխկապակցված անձանց դեմ։
Դատախազությունը ներկայացրել է նրանց անունները․
1.
ՀՀ արդարադատության նախկին նախարար, ՀՀ սահմանադրական դատարանի անդամ Հրայր Թովմասյան2.
ՀՀ էներգետիկ ենթակառուցվածքների և բնական պաշարների նախարարի նախկին տեղակալ Վարդան Գևորգյան3.
ՀՀ նախկին նախագահ Սերժ Սարգսյան4.
ՀՀ ԱԺ նախկին պատգամավոր, ԱՆ հարկադիր կատարումն ապահովող ծառայության նախկին պետ Միհրան Պողոսյան5.
ՀՀ նախկին ոստիկանապետ Վլադիմիր Գասպարյան6.
ՀՀ ԱԱԾ նախկին պաշտոնյա Սերոբ Հարությունյան7.
Երևանի նախկին քաղաքապետ, ՀՀ տրանսպորտի և կապի նախարար Գագիկ Բեգլարյան8.
Երևանի նախկին քաղաքապետ, ՀՀ ԱԺ պատգամավոր Տարոն Մարգարյան9.
Սյունիքի մարզի նախկին մարզպետ Սուրիկ Խաչատրյան10.
Տավուշի մարզի նախկին մարզպետ Հովիկ Աբովյան11.
Երևանի քաղաքապետի նախկին տեղակալ Վահե Նիկոյան12.
Երևան քաղաքի Դավթաշեն վարչական շրջանի նախկին ղեկավար Ռուսլան Բաղդասարյան13.
Աբովյանի նախկին քաղաքապետ Կարապետ Գուլոյան14.
Կոտայքի մարզի Հրազդան համայնքի նախկին ղեկավար Արամ Դանիելյան15.
Երևան քաղաքի Էրեբունի վարչական շրջանի նախկին ղեկավար, ՀՀ ԱԺ նախկին պատգամավոր Մհեր Սեդրակյան16.
ՀՀ նախկին գլխավոր դատախազ, ՀՀ ԱԺ նախկին պատգամավոր Գևորգ Կոստանյան17.
ՀՀ ֆինանսների նախարարության նախաբացթողումային հսկողության նախկին վարչության պետ Վահրամ Գուրողլյան18.
ՀՀ ԱԱԾ ՊՊԾ նախկին առաջին տեղակալ Վաչագան Ղազարյան19.
ՀՀ ԱԺ նախկին պատգամավոր Մանվել Գրիգորյան20.
ՀՀ պաշտպանության նախկին նախարար Սեյրան Օհանյան21.
ՀՀ բնապահպանության նախկին նախարար Արամ Հարությունյան22.
ՀՀ հատուկ հանձնարարություններով նախկին դեսպան Լյովա Սարգսյան (և նրա զավակները):Ինչ վերաբերում է դեռևս ընթացքի մեջ գտնվող ուսումնասիրություններին, դատախազությունից հայտնում են, որ դրանք գաղտնի են և այլ անձանց տրամադրման ենթակա են` միայն ելնելով ապօրինի ծագում ունեցող գույքի բռնագանձման վարույթի նպատակներից։
Հիշեցնենք՝ 2020թ–ի ապրիլի 16-ին ՀՀ ԱԺ–ն ընդունեց «Ապօրինի ծագում ունեցող գույքի բռնագանձման մասին» օրենքի նախագիծը, որով ապօրինի ծագում ունեցող գույքը կարող է բռնագանձվել պետության կողմից, եթե ներկայացված ապացույցների գնահատմամբ դատարանը հանգում է հետևության, որ այդպիսի գույքի շուկայական արժեքը հայցի ներկայացման պահին գերազանցում է հիսուն միլիոն ՀՀ դրամը:
Ուսումնասիրության ենթակա է 1991 թվականի սեպտեմբերի 21-ից հետո ձեռք բերված գույքը, բայց հիմնականում քննության է ենթարկվելու վերջին տասը տարում ձեռք բերված գույքի օրինականությունը: