ԵՐԵՎԱՆ, 3 մարտի - Sputnik. Ատոմային Էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսին այսօր ժամանել է Թեհրան: Իրանի մայրաքաղաքում նա բանակցություններ կվարի Իսլամական Հանրապետության պաշտոնյաների հետ։ Այս մասին հայտնում է Tasnim գործակալությունը։
«Ատոմային Էներգիայի միջազգային գործակալության գլխավոր տնօրեն Գրոսսին ժամանել է Թեհրան քաղաքի Մեհրաբադ օդանավակայան, նրան պաշտոնապես դիմավորել է պաշտոնական ներկայացուցիչ, Իրանի ատոմային էներգիայի կազմակերպության ղեկավարի միջազգային գործերի և իրավական հարցերով տեղակալ Բեհրուզ Քամալվանդին»,-ասվում է հաղորդագրության մեջ:
Հիշեցնենք, որ 2022 թվականի դեկտեմբերին ատոմային Էներգիայի միջազգային գործակալության ղեկավար Ռաֆայել Գրոսին հայտարարել էր, որ Իրանի միջուկային ծրագրի վերաբերյալ Գործողությունների համատեղ ծրագրի վերականգնման շուրջ երկխոսության վերականգնման հույս կա։