ԵՐԵՎԱՆ, 3 մարտի – Sputnik. Երևանում 2 անչափահասի են ձերբակալել, որոնք Մ. Խորենացու փողոցի շենքերից մեկի մուտքի վերելակի մոտ դանակով սպառնացել են ՌԴ քաղաքացուն և հափշտակել նրա բջջային հեռախոսն ու ձեռքի պայուսակը։ Տեղեկությունը հայտնում է ՀՀ քննչական կոմիտեի մամուլի ծառայությունը։
«Դեպքի մասին ՌԴ քաղաքացին հաղորդում է տվել 2023 թվականի մարտի 2-ին։ Նա հայտնել է, որ նույն օրը՝ ժամը 17:35-ի սահմաններում, տղաները հափշտակել են իր «Այֆոն» մոդելի բջջային հեռախոսը և ձեռքի պայուսակը, որի մեջ եղել են բանկային քարտեր, ՀՀ-ում աշխատելու իրավունքի քարտ, և իրեն պատճառվել է զգալի գույքային վնաս»,– ասված է հաղորդագրությունում:
Դեպքի առնչությամբ ՀՀ քրեական օրենսգրքի 252-րդ հոդվածի 2-րդ մասի 3-րդ (ավազակություն, որը կատարվել է մի խումբ անձանց կողմից նախնական համաձայնությամբ) և 5-րդ կետերով (նույն արարքը, որը կատարվել է զենքի կամ մարմնական վնասվածք պատճառելու համար նախապես պատրաստված կամ հարմարեցված առարկայի կամ միջոցի գործադրմամբ) նախաձեռնվել է քրեական վարույթ:
Հաղորդում ներկայացրած անձը տուժող է ճանաչվել, նրա մասնակցությամբ կատարվել է դեպքի վայրի զննություն:
Իրականացված անհետաձգելի միջոցառումների արդյունքում հանցանք կատարելու կասկածանքով ձերբակալվել են 2005թ․ դեկտեմբերին և 2006թ․ փետրվարին ծնված անչափահասներ՝ Երևան քաղաքի և Արարատի մարզի բնակիչներ։
Նրանցից մեկի մոտ անձնական խուզարկությամբ հայտնաբերվել է դանակ և գողոն հանդիսացող հիշյալ մոդելի բջջային հեռախոսը: Տղաներից մեկը նաև տվել է ինքնախոստովանական ցուցմունք՝ նկարագրելով իրենց կատարած գործողությունները։
Նշանակվել են դատաբժշկական, դատաապրանքագիտական փորձաքննություններ, վարութային և ապացուցողական գործողությունները շարունակվում են։