ԵՐԵՎԱՆ, 3 մարտի – Sputnik. Վալերի Բրյուսովի անվան պետական համալսարանի ռեկտորի ընտրությունների ընթացքում համալսարանի վարչական շենքում կատարված ենթադրյալ խուլիգանության դեպքի առթիվ նախաձեռնված քրեական գործը 2023 թվականի մարտի 1-ին մեղադրական եզրակացությամբ ուղարկվել է դատարան, հայտնում են դատախազությունից:
Հիշեցնենք, որ 2022 թվականի դեկտեմբերի 9-ին Վալերի Բրյուսովի անվան պետական համալսարանի ռեկտորի ընտրությունների ընթացքում hամալսարանի վարչական շենքում կատարված խուլիգանության հաղորդման առթիվ՝ քննչական կոմիտեի քրեական օրենսգրքի 297-րդ հոդվածի 1-ին մասով (խուլիգանություն) նախաձեռնվել էր քրեական վարույթ:
Վարույթով պարզվել էր, որ Գ.Թ.-ն, զբաղեցնելով Վալերի Բրյուսովի անվան պետական համալսարանի ռեկտորի գլխավոր խորհրդականի պաշտոնը, համալսարանի վարչական շենքում բարձրաձայն հնչեցրել էր անպարկեշտ արտահայտություններ և հայհոյանքներ:
2022 թվականի դեկտեմբերի 27-ին հսկող դատախազը քրեական հետապնդում է հարուցել Գ.Թ.-ի նկատմամբ, որի հետևանքով խափանման միջոց է ընտրվել երկրից բացակայելու արգելքը և պաշտոնավարման կասեցումը:
Հիշեցնենք նաև, որ Հանրային հեռուստաընկերությունը Բրյուսովի անվան համալսարանի ռեկտորի ընտրությունից հետո հրապարակել էր ռեպորտաժ, որտեղ կային ձայնը փակած մասեր։ Դրանք, ըստ հրապարակումների, հատվածներ էին, որտեղ Գրիշա Թամրազյանը հայհոյում էր այդ ժամանակվա ԿԳՄՍ նախարար Վահրամ Դումանյանին։
Հավելենք, որ այդ դեպքից 2 օր անց նախարար Դումանյանն աշխատանքից ազատվելու դիմում գրեց կառավարության ղեկավարին։