ԵՐԵՎԱՆ, 1 մարտի – Sputnik. Սյունիքի մարզի Շուռնուխ գյուղում տների կառուցման ծրագիրը հետաձգվել է շինանյութերի խնդրի պատճառով։ Այս մասին լրագրողների հետ ճեպազրույցում ասաց Քաղաքաշինության պետական կոմիտեի նախագահ Արմեն Ղուլարյանը։
Նա ընդգծեց, որ խնդիրներ կային նաև ճանապարհների մասով։
«Շուռնուխում շինարարությունն ընթանում է և այս տարվա առաջին կիսամյակի վերջին կավարտենք։ Բավականին բարդ ընթացակարգով են եղել շինարարական այս աշխատանքները։ Ֆինանսավորումն ամբողջությամբ կատարված է, դեռ աշխատանքների սկզբին էր ամեն ինչ արվել»,– նշեց Ղուլարյանը։
Հիշեցնենք՝ ի սկզբանե 13 տների շինարարությունը, որը նախաձեռնվել էր գյուղի մի մասը Ադրբեջանի վերահսկողության տակ անցնելուց հետո, պետք է ավարտվեր 2021 թվականին։ Հետո ժամկետները հետաձգվեցին մինչև 2022 թվականի առաջին կեսը, ավելի ուշ՝ 2022 թվականի վերջը։
Բայց դա էլ վերջը չէր. հունվարին պատկան մարմիններից Sputnik Արմենիայի հարցմանը պատասխանեցին, որ ծրագրի պայմանագրի ամբողջ արժեքի չկատարվող մնացորդը հնարավոր կլինի իրացնել 2023 թվականի առաջին կիսամյակում՝ նշելով դրա պատճառները:
Նշենք, որ Շուռնուխի բնակիչներն արդեն երկու տարի է՝ ստիպված են ապրել Գորիսի բարեկամների տներում, իսկ ոմանք էլ՝ գյուղի դատարկ տներում ու տնակներում։ Գյուղապետը ստիպված ապրում է գյուղապետարանի շենքում։