ԵՐԵՎԱՆ, 28 փետրվարի – Sputnik. «Հայաթ թահրիր աշ Շամ»–ի (արգելված է ՌԴ–ում) ահաբեկիչները խոչընդոտում են երկրաշարժից հետո Դամասկոսից Սիրիայի հյուսիս մարդասիրական բեռներ ուղարկելու գործընթացը։ ՌԻԱ Նովոստիի փոխանցմամբ` այս մասին ՄԱԿ-ի ԱԽ նիստի ժամանակ հայտարարել է ՄԱԿ-ում ՌԴ մշտական ներկայացուցչի առաջին տեղակալ Դմիտրի Պոլյանսկին։
«Նախորդ երկու շաբաթների ընթացքում «Հայաթ թահրիր աշ Շամ»–ի ահաբեկիչների կողմից իրականացվող ակնհայտ սաբոտաժի պատճառով այդպես էլ չի հաջողվել շփման գծերով որևէ մարդասիրական բեռ ուղարկել։ Հաշվի առնելով իրավիճակն այնտեղ, լոգիստիկ հնարավորություններն ու տրանսպորտային ենթակառուցվածքները` երկրի հյուսիս մարդասիրական բեռ ուղարկելը Դամասկոսից չափազանց պահանջված է», – ասել է Պոլյանսկին։
Նրա խոսքով` իրավիճակն առնվազն մտահոգիչ է։
«Չէ՞ որ խոսքը Իդլիբում հաստատված զինյալների մասին է, որոնք մի դեպքում ընդունում են մարդասիրական օգնությունը, մյուսում` խոչընդոտում։ Եվ նրանց, ցավոք, այդ հարցում աջակցում են խորհրդի մի շարք պատվիրակություններ, որոնք միայն շատ մեղմ մտահոգություն են արտահայտում տեղի ունեցածի վերաբերյալ` թույլ չտալով խորհրդին արդար գնահատական տալ ահաբեկիչների գործողություններին», – ընդգծել է նա։
Փետրվարի 6-ին Թուրքիայի հարավ–արևելքում տեղի ունեցած ուժեղ երկրաշարժերը գրանցվեցին նաև հարևան Սիրիայում։ Պաշտոնական տվյալներով` այնտեղ զոհերի թիվը գերազանցել է 1.4 հազարը, վիրավորվել է շուրջ 2.5 հազար սիրիացի։