ԵՐԵՎԱՆ, 27 փետրվարի – Sputnik. Խուզարկություններ կատարելուց առաջ իրավապահ մարմինները պահանջել են, որ անջատվեն սուպերմարկետների տարածքը տեսանկարահանող սարքերը։ «Նոր Զովք» խանութների ցանցը հայտարարություն է տարածել` անդրադառնալով օրերս 29 սուպերմարկետներում, գրասենյակներում և մի շարք աշխատակիցների բնակարաններում անցկացված խուզարկություններին։
«Եթե իրավապահ մարմինները վստահ են, որ օրինական խուզարկություն են կատարելու, որ օրենքի խախտումներ թույլ չեն տալու, ապա ինչո՞ւ են նախապես անջատել տալիս տեսանկարահանող սարքերը, առավել ևս, եթե վերջում առգրավելու են նաև այդ տեսագրող սարքերի կրիչները»,– ասված է հայտարարության մեջ։
Նշվել է, որ խուզարկությունների արդյունքում ոչ միայն առգրավվել են ընկերության հաշվապահական փաստաթղթերը, համակարգիչները, այլև ապրանքների վաճառքի համար պարտադիր դրամարկղային որոշ մեքենաներ ու ընկերության հաշվապահական հաշվառման վարումն ապահովող ծրագիրը (ՀԾ) պարունակող սերվերը։
Սերվերի առգրավման հետևանքով ընկերությունը զրկվել է մատակարարների հանդեպ պարտավորությունները մարելու, ընկերության 29 խանութներում և պահեստներում ապրանքներ ստանալու, շուրջ 1600 աշխատակիցների աշխատավարձերը հաշվարկելու և վճարելու և այլ հնարավորություններից։
«Եթե խուզարկության նպատակը բացառապես համապատասխան տվյալների ստուգումն ու հավաքագրումն է, ապա ինչո՞ւ են իրավապահ մարմինները առգրավել այդ ծրագիրը պարունակող սերվերը, այլ ոչ թե դրանում առկա տեղեկատվությունը, որի լիարժեք հնարավորությունն ունեցել են և որի արդյունքում ընկերությունը չէր զրկվի իր ամենօրյա գործունեության պարտադիր մաս կազմող ծրագրի հասանելիությունից։ Ավելին` արդեն մի քանի օր է` իրավապահ մարմիններին հասցեագրվող միջնորդություններով խնդրում ենք վերադարձնել այդ սերվերը կամ գոնե սերվերից պատճենահանված ծրագիրը, ինչը ևս մինչ օրս չի կատարվել»,– նշված է հայտարարության մեջ։
Ընկերության համար անհասկանալի է, թե իրավապահ մարմինների աշխատանքն ինչ նպատակ է հետապնդում։ Հույս ունեն, որ իրականացվող քրեական վարույթը դուրս չի գա օրինականության սահմանից` մրցակիցների համեմատ խիստ անբարենպաստ պայմաններ առաջացնելով «Նոր Զովքի» համար։