ԵՐԵՎԱՆ, 26 փետրվարի – Sputnik. Մեծ Բրիտանիայի թագավոր Չարլզ III-ի թագադրմանը կհրավիրվեն օտարերկրյա միապետներ՝ դարավոր ավանդույթին հակառակ։ Այս մասին գրում է Daily Mail-ը՝ հղում անելով իր աղբյուրներին։
«Թագուհու թագադրման ժամանակ (Եղիսաբեթ II-ի–խմբ.) թագադրված միապետներ չեն եղել, միայն պրոտեկտորատ կառավարիչներ, ինչպիսին է Տոնգայի թագուհին: Սա դարեր շարունակ ավանդույթ է եղել... Հրավերքը Հորդանանի թագավորին, Բրունեյի սուլթանին, Օմանի սուլթանին և Սկանդինավյան թագավորական անձանց, որոնք բոլորն էլ Չարլզի ընկերներն են, փափուկ ուժի և դիվանագիտության լավ օրինակ կլինի»,- հրատարակությանը հայտնել է աղբյուրը։
Մեկ այլ աղբյուր լրատվամիջոցին հայտնել է, որ թագադրման հյուրերի ցուցակը ավելի շատ նմանվելու է թագավորական հարսանիքի հրավիրվածների ցանկին, քան յոթ տասնամյակ առաջ տեղի ունեցած թագադրությանը:
Չարլզ 3-րդի թագադրման համար կօգտագործվի Սուրբ Էդվարդի թագը, որը փոփոխությունների ավարտից հետո վերադարձվել է Թաուեր:
Թագուհի-կոնսորտ Կամիլան կթագադրվի հանգուցյալ Եղիսաբեթ 2-րդի տատի` Մերի թագուհու թագով։ Մի քանի դարի ընթացքում առաջին անգամ արարողության համար նոր թագ չի պատրաստվի։
Հիշեցնենք` Մեծ Բրիտանիայի թագուհի Եղիսաբեթ Երկրորդը, որը երկիրը կառավարում էր ավելի քան 70 տարի, մահացավ 2022 թվականի սեպտեմբերի 8-ին Շոտլանդիայում: Արքայազն Չարլզը թագավոր դարձավ` վերցնելով Չարլզ III անունը, նրա կինը` Կամիլան, ստացավ թագուհի-կոնսորտի (արքայակին) կարգավիճակ։
Չարլզ 3-րդի և նրա կնոջ թագադրման արարողությունը տեղի կունենա 2023 թվականի մայիսի 6-ին։