ԵՐԵՎԱՆ, 26 փետրվարի – Sputnik. ԱՄՆ-ն չի կարծում, որ Իրանի ղեկավարությունը որոշել է վերսկսել միջուկային զենքի ստեղծման ծրագիրը, հայտարարել է ԿՀՎ տնօրեն Ուիլյամ Բերնսը:
Ավելի վաղ արևմտյան ԶԼՄ-ները հայտնել էին, որ միջազգային դիտորդներն Իրանում մինչև 84 տոկոս հարստացված ուրան են հայտնաբերել, ինչը մի փոքր ցածր է այն մակարդակից, որն անհրաժեշտ է միջուկային զենքի ստեղծման համար: Իրանի Ատոմային էներգիայի կազմակերպության պաշտոնական ներկայացուցիչ Բեհրուզ Քամալվանդին ի պատասխան հայտարարել է, որ Թեհրանն այդ հաղորդագրությունները որպես փաստերի խեղաթյուրում է գնահատում: Փետրվարի 22-ին հայտնի դարձավ, որ ՄԱԳԱՏԷ-ի տեսուչները ստուգումներ են իրականացնում Իրանի միջուկային օբյեկտներում։
«Մենք չենք կարծում, որ Իրանի գերագույն առաջնորդը որոշում է կայացրել վերսկսել միջուկային զենքի ստեղծման ծրագիրը, որը հետաձգվել կամ դադարեցվել էր 2003 թվականին», - ասել է Բերնսը CBS հեռուստաալիքին տված հարցազրույցում:
Նա ընդգծել է, որ ամերիկացիները ոչ մի ապացույց չունեն, որ Թեհրանը վերսկսել է այդ նախագիծը։
2015 թվականին Մեծ Բրիտանիան, Գերմանիան, Չինաստանը, Ռուսաստանը, ԱՄՆ–ն, Ֆրանսիան և Իրանը միջուկային գործարք (Իրանի միջուկային ծրագրի վերաբերյալ Համապարփակ համատեղ գործողությունների ծրագիր) կնքեցին, որը պատժամիջոցների չեղարկում էր ենթադրում Իրանի միջուկային ծրագրի սահմանափակման դիմաց։
2018 թվականի մայիսին ԱՄՆ–ն Դոնալդ Թրամփի օրոք միակողմանի դուրս եկավ Համապարփակ համատեղ գործողությունների ծրագրից և վերականգնեցին պատժամիջոցները Թեհրանի դեմ։ Ի պատասխան Իրանը հայտարարեց, որ փուլ առ փուլ կրճատելու է իր պարտավորությունները համաձայնագրի շրջանակում` հրաժարվելով միջուկային հետազոտությունների, ցենտրիֆուգների և ուրանի հարստացման մակարդակի սահմանափակումներից։
Վիեննայում բանակցություններ էին ընթանում ՀՀԳԾ-ի վերականգնման և Թեհրանի դեմ Վաշինգտոնի պատժամիջոցների չեղարկման շուրջ։ 2021 թվականի դեկտեմբերին կողմերը համաձայնության են եկել համաձայնագրի երկու նախագծերի շուրջ․ եվրոպական կողմը ներառել է դրանց շուրջ նաև Իրանի դիրքորոշումները։ Իրանի ներկայացուցիչ Բաղերի Քիանիի խոսքով՝ բանակցությունները հաջող են ընթացել, սակայն ԱՄՆ պետդեպարտամենտի ներկայացուցիչ Նեդ Փրայսը Վիեննայի առաջընթացը «համեստ» էգնահատել՝ կոչ անելով Թեհրանին լուրջ վերաբերվել հարցին: