ԵՐԵՎԱՆ, 25 փետրվարի – Sputnik. ՀՀ կառավարությունը կաջակցի «Թումոյին» արհեստների ուսուցման ծրագրում։ Sputnik Արմենիայի հետ զրույցում տեղեկությունը հայտնեց ՀՀ էկոնոմիկայի նախարարի տեղակալ Ռաֆայել Գևորգյանը։
Եթե նախկինում «Թումոն» ուսուցանում էր ծրագրավորում, 3D դիզայն ու ռոբոտատեխնիկայի հիմունքներ, ապա նոր ծրագիրը ներառում է ոսկերչություն, հագուստի դիզայն և արտադրության տեխնոլոգիա, կահույքի ռեստավրացիա ու խեցեգործություն, ինչպես նաև եռակցում։
«Այժմ նրանք նախատեսում են ձեռք բերել նորագույն, բազմաառանցք հաստոցներ, որոնցով կուսուցանեն բանվորական մասնագիտություններ` ներառյալ եռակցման դասընթացներ։ Թե՛ զոդողները, թե՛ խառատներն ու փականագործները պահանջված են աշխատաշուկայում` բավականին բարձր աշխատավարձով։ Սրա մասին է վկայում թեկուզ այն, որ վերջին ամիսներին մասնավոր կազմակերպությունները սկսել են եռակցման վճարովի դասընթացներ անցկացնել», – ասաց փոխնախարարը։
Ինչ վերաբերում է դասընթացավարներին, ապա նախատեսվում է ներգրավել թե՛ տեղացի գործող մասնագետներին, թե՛ արտասահմանցիներին։
Կառավարությունը նախատեսում է այս ծրագրին աջակցել տարածքի տրամադրման կամ վարձակալության մասնակի փոխհատուցման ձևով։
«Թումո» տեխնոլոգիական կենտրոններում երեխաներին անվճար սովորեցնում են դիզայնի, տեսանկարահանման և մոնտաժման, ծրագրավորման, ինչպես նաև համակարգչային տեխնիկայի հետ կապված այլ հմտություններ։ Առաջին կենտրոնը բացվել է 2011 թվականին Երևանում։
«Թումոն» կենտրոններ ունի նաև Դիլիջանում, Գյումրիում, Ստեփանակերտում։ Հայաստանից դուրս կենտրոններ կան Փարիզում, Բեյրութում, Մոսկվայում, Տիրանայում, Բեռլինում և Լիոնում: