ԵՐԵՎԱՆ, 25 փետրվարի – Sputnik. ԵՄ երկրները մի քանի օր քննարկելուց հետո հավանություն են տվել Ռուսաստանի դեմ պատժամիջոցների տասներորդ փաթեթին։
«Եվրամիության պատժամիջոցների նոր փաթեթը սահմանափակող միջոցներ է նախատեսում ավելի քան 120 ֆիզիկական և իրավաբանական անձանց նկատմամբ»,– հայտարարել է Նիդեռլանդների արտաքին գործերի նախարար Վոպկե Հուքստրան:
Նախարարը նշել է, որ Նիդեռլանդների նախաձեռնությամբ ցուցակում ներառվել են «ուկրաինացի երեխաների արտաքսման պատասխանատուներին»։ Բացի այդ, նրա խոսքով, սահմանափակումների տակ են հայտնվել զենք արտադրողները, ինչպես նաև նրանք, ովքեր Ռուսաստանին օգնել են խուսափել պատժամիջոցներից:
Փաթեթը արտահանման ավելի խիստ սահմանափակումներ է ներառում երկակի նշանակության ապրանքների և տեխնոլոգիաների համար, ընդ որում՝ ոչ միայն ՌԴ ուղիղ մատակարարումների, այլև երկրի տարածքով այդ ապրանքների տարանցման դեպքում, արգելված է ՌԴ-ից սինթետիկ կաուչուկի և բիտումի ներմուծումը:
Ընդ որում` սև ցուցակում ներառված են յոթ իրանական ընկերություններ, որոնք իբր կապված են Ռուսաստանի հետ և իբր դրոններ են մատակարարում նրան։ Բացի այդ, ԵՄ ցուցակում են հայտնվել ռուսական երեք բանկեր՝ Ալֆա-Բանկը, Տինկոֆ Բանկը և Ռոսբանկը։
Ռուսաստանի քաղաքացիներին այսուհետ արգելվում է ղեկավարել կրիտիկական ենթակառուցվածքների ընկերություններ և օգտագործել ԵՄ գազապահեստարանները` բացառությամբ հեղուկացված բնական գազի մի քանի պահեստարանի:
«Ռուսական ապատեղեկատվության» դեմ միջոցառումներով էլ արգելվում է արաբական RT և Sputnik ծառայությունների հեռարձակումը։ Հասցեական սահմանափակող միջոցառումներ են ձեռնարկվել նաև ֆիզիկական և իրավաբանական անձանց նկատմամբ, որոնց Եվրամիությունը «քարոզչություն տարածելու» մեղադրանք է ներկայացնում։
Հիշեցնենք` ՌԴ-ն բազմիցս նշել է, որ կհաղթահարի պատժամիջոցային ճնշումը, որն Արևմուտքը սկսել է գործադրել Ռուսաստանի վրա մի քանի տարի առաջ և շարունակում է ուժեղացնել։
ՌԴ նախագահ Վլադիմիր Պուտինն ավելի վաղ հայտարարել էր, որ Ռուսաստանին զսպելու ու թուլացնելու քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել համաշխարհային տնտեսությանը: Նրա խոսքով՝ Արևմուտքի հիմնական նպատակը միլիոնավոր մարդկանց կյանքը վատացնելն է։