ԵՐԵՎԱՆ, 25 փետրվարի – Sputnik. Հաշվի առնելով պատժամիջոցների 10-րդ փաթեթը՝ ԵՄ-ից Ռուսաստան արտահանման գրեթե կեսը (2021 թվականի դրությամբ) հայտնվել է սահմանափակող միջոցների տակ, ասվում է Եվրահանձնաժողովի հայտարարության մեջ։ Տեղեկությունը հայտնում է ՌԻԱ Նովոստին։
ԵՄ խորհուրդն այսօր հաստատել է պատժամիջոցների նոր փաթեթը, որն ուժի մեջ կմտնի ավելի ուշ՝ պաշտոնական ամսագրում հրապարակվելուց հետո, այդ ժամանակ էլ հայտնի կդառնան անձնական սահմանափակումների տակ հայտնված ֆիզիկական անձանց և կազմակերպությունների անվանական ցանկը։
«Արգելքներն ու սահմանափակումները վերաբերում են Եվրամիությունից 11,4 միլիարդ եվրոյի արտահանմանը (2021 թվականի դրությամբ)։ Դրանք լրացնում են ավելի վաղ ընդունված պատժամիջոցների փաթեթներին համապատասխան 32,5 մլրդ եվրոյի արտահանման արգելքը։ Հաշվի առնելով այսօրվա փաթեթը՝ Եվրամիությունն ընդհանուր առմամբ պատժամիջոցներ է սահմանել 2021 թվականի տվյալներով Ռուսաստանի ուղղությամբ իր արտահանման գրեթե կեսի (49%) դեմ»,- ասված է փաստաթղթում։
Հիշեցնենք` ՌԴ-ն բազմիցս նշել է, որ կհաղթահարի պատժամիջոցային ճնշումը, որն Արևմուտքը սկսել է գործադրել Ռուսաստանի վրա մի քանի տարի առաջ և շարունակում է ուժեղացնել։
ՌԴ նախագահ Վլադիմիր Պուտինն ավելի վաղ հայտարարել էր, որ Ռուսաստանին զսպելու ու թուլացնելու քաղաքականությունը Արևմուտքի երկարաժամկետ ռազմավարությունն է, իսկ պատժամիջոցները լուրջ հարված են հասցրել համաշխարհային տնտեսությանը: Նրա խոսքով՝ Արևմուտքի հիմնական նպատակը միլիոնավոր մարդկանց կյանքը վատացնելն է։