ԵՐԵՎԱՆ, 22 փետրվարի – Sputnik. Պետական կառավարման համակարգը Երևանի փոքր կենտրոնից և ընդհանրապես կենտրոնից պետք է դուրս բերել։ Նման հայտարարությամբ է հանդես եկել վարչապետ Նիկոլ Փաշինյանը, որի գլխավորությամբ արդարադատության թաղամասի կառուցման վերաբերյալ խորհրդակցություն է տեղի է ունեցել, տեղեկանում ենք վարչապետի աշխատակազմից։
«Պետական գույքի ճիշտ կառավարումը, որ կա Երևան քաղաքի փոքր կենտրոնում և կենտրոնում, կարող է պետությանը տասնյակ միլիարդների եկամուտներ բերել և ավելի արդյունավետ դարձնել կառավարման գործընթացները: Մինչդեռ այսօր ուղիղ հակառակն է: Կարծում եմ` այստեղ էլ մենք մտածողության և մտածելակերպի փոփոխության կարիք ունենք, և այդ ռազմավարությունը պետք է որդեգրենք՝ Երևան քաղաքի փոքր կենտրոնից և ընդհանրապես կենտրոնից պետական կառավարումն ամբողջությամբ դուրս հանելու և այս ֆիզիկական ենթակառուցվածքը պետեկամուտների աճին ծառայեցնելու նպատակն իրագործելու առումով՝ իհարկե, խստորեն պահպանելով և պաշտպանելով պատմամշակութային հուշարձանների կառավարման հետ կապված բոլոր կանոնները»,–ասել է Փաշինյանը։
Նրա խոսքով` աշխարհում, ընդհուպ շատ մայրաքաղաքներում, կան դարերի հնություն ունեցող շենքեր, որոնք մասնավոր հատվածին կամ վարձակալությամբ են տրված, այսինքն՝ դա ճիշտ մոդել է և պետությանը միլիարդների եկամուտներ է բերում, բայց, մյուս կողմից էլ, այդ պատմամշակութային հուշարձանները պահպանվում են։
Փաշինյանն ասել է, թե Երևան քաղաքի նաև ոչ կենտրոնական հատվածներում կան տարածքներ, որոնք հենց այսօր էլ մասնավոր հատվածի համար շատ գրավիչ են, և այդտեղ պետական ներդրումներ անելու տրամաբանությունն արդարացված չէ: Ընդհակառակը, պետք է պետական ներդրումներ անեն այն հատվածներում, որոնք բացարձակապես գրավիչ չեն կամ նվազ գրավիչ են մասնավոր հատվածի համար:
«Բայց այս գաղափարն իրագործելու ճանապարհին, իհարկե, արդարադատության թաղամասն առաջին հատվածն է: Եթե սրա մեկնարկը մենք հաջողությամբ տանք և սկսենք իրագործումը, մեծ հավանականությամբ գաղափարը կզարգանա և կծավալվի նաև այդ ուղղությամբ։ Եվ հիմա ուզում ենք մտածել, թե ինչ կարող ենք անել, որպեսզի այդ ամենն ավելի արդյունավետ դարձնենք, որպեսզի առաջինը դատաիրավական համակարգի համար աշխատանքային պատշաճ, սոլիդ պայմաններ ստեղծվեն, այսպես ասած՝ առանց կցակառույցների տրամաբանության։ Երկրորդը՝ հնարավորինս արժանապատիվ պայմաններ ստեղծվեն նաև կալանքի տակ գտնվող անձանց, դատավարության կողմերի համար և այլն»,–հավելել է վարչապետը։
Նա նշել է նաև, որ սա գաղափար է, որի իրագործման վրա բավական ջանք են գործադրել, տարբեր նախագծեր և տարբերակներ են քննարկվել, և դեռ վերջնական կողմնորոշում չունեն, այդ թվում` տեխնիկական պատճառներով:
Հավելենք, որ խորհրդակցությանը մասնակցել են փոխվարչապետ Տիգրան Խաչատրյանը, ԲԴԽ նախագահ Կարեն Անդրեասյանը, արդարադատության նախարար Գրիգոր Մինասյանը, ՆԳ նախարար Վահե Ղազարյանը և այլ պաշտոնատար անձինք: