ԵՐԵՎԱՆ, 22 փետրվարի – Sputnik. Հայաստանն ադրբեջանական կողմից հաստատում է ստացել Ստեփանակերտի և Բաքվի միջև միջազգային տեսանելի մեխանիզմի միջոցով բանակցություն անցկացնելու պատրաստակամության վերաբերյալ։ Լյուքսեմբուրգի Մեծ Դքսության արտգործնախարար Ժան Ասելբորնի հետ համատեղ ասուլիսի ժամանակ այս հայտարարությունն արեց ՀՀ արտգործնախարար Արարատ Միրզոյանը։
Նա շեշտեց, որ հաստատումը ստացել են ոչ միայն Էնթոնի Բլինկեն– Իլհամ Ալիև–Նիկոլ Փաշինյան ֆորմատի քննարկումների ընթացքում, այլև պանելային քննարկման ժամանակ։
«Վերջին տարիներին մենք տեսել ենք, որ ձեռք են բերվում պայմանավորվածություններ, խոստումներ են տրվում, բայց հետո տեսնում ենք, որ ադրբեջանական կողմը նահանջում է այդ դիրքորոշումներից և ստորագրված հանրահայտ պայմանավորվածություններից։ Հույս ունեմ, որ այս անգամ նման բան չի լինի, և մենք չեն առերեսվի նույն այդ իրավիճակի հետ»,– ասաց Միրզոյանը։
Նա նշեց, որ Ադրբեջանի հետ խաղաղության պայմանագրի շուրջ քննարկումների սկզբից պայմանավորվածություն էր ձեռք բերվել, և այդ քննարկումները պետք է անցկացվեին 2 ուղղությամբ։
«Մեկը Հայաստանի և Ադրբեջանի միջև հարաբերությունների հաստատման, կարգավորման շուրջ է, որը կարճ անվանում ենք խաղաղության պայմանագիր, իսկ մյուսը հարթակ է, որտեղ պետք է քննարկվի Լեռնային Ղարաբաղում ապրող բնակչության, հայության իրավունքներն ու անվտանգությունը»,– ընդգծեց ՀՀ արտգործնախարարը։
Ըստ Միրզոյանի` տևական ժամանակ է` Ադրբեջանը խուսանավում է այս բանակցություններում ներգրավվելուց։