ԵՐԵՎԱՆ, 22 փետրվարի – Sputnik. Հայաստանն այսօր 250 միլիոն դոլարանոց փաթեթ է ստորագրելու «Լիդիան Արմենիա» ընկերության հետ: ԱԺ տնտեսական հարցերի հանձնաժողովի նիստում այս մասին հայտարարեց ՀՀ էկոնոմիկայի նախարար Վահան Քերոբյանը:
Նախարարի խոսքով` պետք է տնտեսական կառուցվածքն այնպես փոխել, որպեսզի հանքարդյունաբերությունը չդառնա գերիշխող ճյուղ, սակայն այդ ոլորտի նվազեցումն ինքնանպատակ չէ։ Քերոբյանի պնդմամբ` այդ ամենը տեղի է ունեցել 2-րդ խոշոր հանքի (Թեղուտի հանքավայր) չշահագործվելու պատճառով։ Քերոբյանը վստահեցրեց` կփորձեն լուծումներ գտնել, որպեսզի այդ հանքը կրկին շահագործվի։
«Հենց այսօր մենք կստորագրենք այլ խոշորագույն հանքի հետ կապված փաստաթղթեր, որոնք կազդարարեն այդ հանքի աշխատանքի վերսկսելը: Խոսքն Ամուլսարի մասին է: Մենք այսօր ժամը 17։00-ին 250 մլն դոլարանոց փաթեթ ենք ստորագրելու, որը թույլ կտա վերսկսել ևս մեկ հանքի շահագործումը, որի վերաբերյալ պարտավորությունները վաղուց կան»,-ասաց նա:
Հիշեցնենք` Ամուլսարը ոսկու երկրորդ խոշոր հանքավայրն է Հայաստանում: Գտնվում է ՀՀ Վայոց Ձորի և Սյունիքի մարզերի սահմանագլխին, Զանգեզուրի լեռնաշղթայի հյուսիս, հյուսիսարևմտյան ճյուղավորումների ջրբաժանային մասում, 2500-2988 մ բացարձակ բարձրությունների վրա:
Այն ղեկավարում է «Լիդիան Արմենիա» ՓԲԸ-ն, որը միջազգային «Lydian international» ընկերության դուստր ձեռնարկությունն է:
Տևական ժամանակ է` հանքավայրը չի գործում։ Լիբանանյան «Էլարդ» ընկերությունն Ամուլսարի հանքի շահագործման ընթացքում իրականացրել էր շրջակա միջավայրի ռիսկերի գնահատում:
Ընկերության ներկայացուցիչները ուսումնասիրել էին դեռևս 2016 թ.-ին «Լիդիան Արմենիա» ընկերության պատրաստած շրջակա միջավայրի վրա ազդեցության գնահատումը և հայտարարել հնարավոր ռիսկերի մասին: Միևնույն ժամանակ Հայաստանի քննչական կոմիտեի ներկայացուցիչները նշել են, որ ռիսկերը կառավարելի են: