ԵՐԵՎԱՆ, 18 փետրվարի - Sputnik. «Ժողովուրդ» օրաթերթին ուշագրավ մանրամասներ են հայտնի դարձել ոստիկանության էրեբունու բաժնի պետ Արմեն Գասպարյանի գործունեության մասով: Պարզվում է՝ հեղափոխությունից առաջ ՀՀ ոստիկանապետի նախկին տեղակալ Հունան Պողոսյանը Արմեն Գասպարյանին համակարգից հեռացրել էր լուրջ բացահայտումներից հետո:
Մասնավորապես` Արմեն Գասպարյանի գործունեության մասով բացահայտվել էր, որ նա մահացած քաղաքացու անունով ոստիկանությունից մեկ տարի շարունակ գումար է դուրս գրել, ինչը ստուգումների արդյունքում բացահայտվել էր:
«Հեղափոխությունից մի քանի տարի անց նրան ներկայիս իշխանությունները նշանակել են ոստիկանության Էրեբունու բաժնի պետ, որտեղ էլ օրեր առաջ գրանցվեց ամոթալի միջադեպը»,– գրում է թերթը:
Նշենք, որ փետրվարի 8-ին ՀՀ ՆԳՆ ոստիկանության Երևան քաղաքի էրեբունու բաժնի օպերատիվ հետախուզության բաժնի աշխատակիցները բերման էին ենթարկել անչափահասների, ծեծի ենթարկել և խոշտանգել նրանց։ Հաջորդ օրը, ըստ փաստաբանների հայտարարությունների, ոստիկանության Էրեբունու բաժնում առերես հարցաքննության ժամանակ ոստիկանները նախ հայհոյել, այնուհետև ծեծի են ենթարկել նաև փաստաբանական պալատի երկու փաստաբանների։