«Սխալների ուղղում», կամ կարճ այն մասին, թե ինչպես է աշխատում ՀՀ կառավարությունը

Հասկանալու համար, թե ինչպես է աշխատում Հայաստանի կառավարությունը, բավական է պարզապես ծանոթանալ կառավարության վաղվա նիստի օրակարգում ընգրկված հարցերից 3-ին։

Օրակարգի 10, 11 և 12 նախագծերն իրականում ոչ թե կառավարության առանձին որոշումներ են, այլ նախկինում ընդունած որոշումների շտկումներ, կամ դպրոցական լեզվով ասած` սխալների ուղղում։

Առաջին երկու նախագծերը կազմվել են հատուկ 2022թ–ի սեպտեմբերին ընդունած որոշումների վիրիպակները շտկելու համար։ Այլ կերպ ասած` 5 ամիս առաջ գործադիրը միաձայն հավանություն է տվել այդ նախագծերին, իսկ երբ հասել է դրանք կատարելու ժամանակը` հանկարծ պարզվել է, որ դրանցում էական վրիպակներ կան, որոնք ուղղելու համար կառավարության հաստատմանն են ներկայացրել երկու նոր որոշումներ։

Մյուս որոշմամբ կառավարությունը շտկում է նախորդ որոշման մեջ թույլ տված մաթեմատիկական սխալը։ Այստեղ 71 576 800 դրամի փոխարեն ամիսներ առաջ գրած են եղել 70 317 200։ Արդյունքում ծրագրի ամբողջական արդյունքն էլ 357 884 000–ի փոխարեն հաշվել են 351 586 000։

Բայց երևի հասել են մի կետի, երբ հասկացել են, որ ծրագրի բյուջեից ավելի քան 6 մլն դրամ է պակասում։ «Մաթեմատիկայի» խնդիրն ուղղելու համար էկոնոմիկայի նախարարությունը կառավարությանը նոր նախագիծ է ներկայացրել` արդեն ուղղված թվերով։

Բայց ամենազավեշտալին, իհարկե, շրջակա միջավայրի նախարարության ներկայացրած որոշման նախագիծն է։ Դրանով գերատեսչությունը գործադրին առաջարկում է սխալների ուղղում կատարել 2023 թվականի պետական բյուջեի կատարումն ապահովող միջոցառումների ծրագրում։

Բանն այն է, որ նախարարությունում հանկարծ հայտնաբերել են, որ 2022թ–ի դեկտեմբերի 29-ին հաստատված ծրագրում մոռացել են ներառել 2023-ին Անտառային կոմիտեի կողմից իրականացվելիք «Անտառվերականգնման և անտառապատման աշխատանքների» գնման անվանացանկը։

Հատկանշանակ է, որ նախարարությունն իր այս բացթողումը որոշման նախագծի հիմնավորման մեջ արդարացնում է «տեխնիկական պատճառներով»։ Բայց, դե փաստը մնում է փաստ, որ բնության պահպանության համար պատասխանատու պետական գերատեսչությունը մոռացել է, որ իր կարևոր գործառույթներից մեկն էլ անտառվերականգնման և անտառապատման աշխատանքներ իրականացնելն է։ Հատկապես, որ ինչ–որ մի պահի կառավարության ղեկավարի հետ միասին հանրությանը խոստացել էին 10 մլն ծառ տնկել։

Դրանց մասին կիմանան միայն նրանք, ովքեր իսկապես հետաքրքրվում են, թե ինչպես է աշխատում հայրենի երկրի կառավարությունը, ինչ որոշումներ է ընդունում ու ինչպես է դրանք կատարում։

Կասեք` սխալներն անխուսափելի՞ են, հատկապես, որ չի սխալվում նա, ով գործ չի անում։ Գուցե համաձայնեինք, եթե սխալներն ու վրիպակներ կառավարության աշխատանքում համատարած չլինեին։ 3 սխալ որոշումը մեկ նիստում բավական խոսուն ցուցանիշ է, հատկապես, որ նման նախագծերը մեր կառավարության նիստերի օրակարգում բավական հաճախ են հանդիպում։