ԵՐԵՎԱՆ, 15 փետրվարի – Sputnik. Հայաստան-Թուրքիա հարաբերությունների կարգավորման բանակցություններում Թուրքիայի հատուկ ներկայացուցիչ Սերդար Քըլըչը ՀՀ արտգործնախարար Արարատ Միրզոյանին դիմավորելուց հետո Twitter–ի իր էջում գրառում է կատարել։
«Աշխարհագրությունը մեր ընդհանուր ճակատագիրը որոշող ամենակարևոր գործոնն է, երբեմն, ինչպես հիմա, այդ ճակատագիրը ձևավորում են տառապանքները։ Տարածաշրջանի երկրների միջև ցուցաբերած մարդասիրական համերաշխությունը լավագույն դեղամիջոցն է այդ տառապանքները մեղմելու համար։ Ինչպես տարածաշրջանի բոլոր երկրները, Հայաստանն էլ առանց վարանելու կանգնեց թուրք ժողովրդի կողքին»,– գրել է Քըլըչը։
Նշենք, որ ՀՀ արտգործնախարար Արարատ Միրզոյանի Թուրքիա այցելած հայկական պատվիրակությանը դիմավորել է հենց Քըլըչը։
Հիշեցնենք` ՀՀ արտգործնախարարը Թուրքիա է մեկնել այսօր։ Նրա գլխավորած պատվիրակության կազմում է նաև Հայաստան-Թուրքիա հարաբերությունների կարգավորման բանակցություններում Հայաստանի հատուկ ներկայացուցիչ, Ազգային ժողովի փոխնախագահ Ռուբեն Ռուբինյանը: Միրզոյանն իր պաշտոնավարման ընթացքում երկրորդ անգամ է այցելում Թուրքիա։ 2022 թվականի մարտին նա մասնակցել էր Անթալիայում կազմակերպված դիվանագիտական ֆորումին, որտեղ բանակցել էր Չավուշօղլուի հետ։